უამინდობას დასავლეთ საქართველოში მნიშვნელოვანი ზარალი არ გამოუწვევია. რეგიონული განვითარებისა და ინფრასტრუქტურის სამინისტროს ინფორმაციით , მოსალოდნელი უამინდობის გამო, დასავლეთ საქართველოში გუშინ გაემგზავრა რეგიონული განვითარებისა და ინფრასტრუქტურის სამინისტროს ჯგუფი, მინისტრის მოადგილის, შოთა მურღულიას ხელმძღვანელობით.
სამინისტროს წამრომადგენლები, მთელი ღამის განმავლობაში მოძრაობდნენ შავიზღვისპირა მუნიციპალიტეტებში და ადგილობრივი თვითმართველობის ხელმძღვანელებთან ერთად აკონტროლებდნენ ვითარებას.
შოთა მურღულიას განცხადებით, ინტენსიური წვიმა დასავლეთ საქართველოში 20.00 საათზე დაიწყო და 24.00 საათისთვის გაძლიერდა. ყველაზე უხვი ნალექი დილის 3 საათისთვის დაფიქსირდა, თუმცა, წვიმას არ ახლდა ძლიერი ქარი, რამაც პრობლემები შეამცირა.
სამინისტროს წარმომადგენლები იყვნენ ბათუმში, ქობულეთში, ფოთში, ზუგდიდში, ხობში, ჩოხატაურსა და ლანჩხუთში. ძლიერი წვიმის შედეგად, დაიტბორა ბათუმის რამდენიმე ქუჩა, ერთი ქუჩა დაიტბორა ასევე, ხობში. შესაბამისი ამოტუმბვითი სამუშაოები ორივე ქალაქში მომენტალურად დაიწყო. პრობლემები არ დაფიქსირებულა ფოთში. მდინარე და ღელეები ადიდდა ჩოხატაურის რამდენიმე მუნიციპალიტეტში. შოთა მურღულიას განცხადებით, შესამოწმებელია ზუგდიდის რამდენიმე ხიდი, რადგან მდინარე იქაც ადიდდა.
რეგიონული განვითარებისა და ინფრასტრუქტურის სამინისტროს ჯგუფ ბათუმისკენ მიემართება. ბათუმის შემდეგ, ჯგუფი გურიასა და იმერეთში გადავა და იქ არსებულ ვითარებასაც შეისწავლის.
05.09.13
