„ახალი სისტემა არა მხოლოდ სახელმწიფო უსაფრთხოების სამსახურისგან, ყველა სახელმწიფო უწყებისგან დამოუკიდებელია. საჯარო სისტემაში ამ შტოს ფარგლებში, დამოუკიდებლობის უფრო მაღალი ხარისხი პრაქტიკულად არ არსებობს“. ე.წ მოსმენების კანონზე, საპარლამენტო უმრავლესობის და პრეზიდენტის ადმინისტრაციის თანამშრომლობის დეტალებზე, ფრაქცია „ქართული ოცნების“ თავმჯდომარემ, მამუკა მდინარაძემ, ტელეკომპანია „იმედზე“, გადაცემა „ქრონიკის“ ეთერში ისაუბრა.
„პრეზიდენტი კანონშემოქმედებაში მონაწილეობს მას შემდეგ, რაც პარლამენტი მიიღებს გადაწყვეტილებას, შემდეგ პრეზიდენტმა უნდა განიხილოს ეს კანონი და მიიღოს გადაწყვეტილება ხელმოწერის ან ვეტოს დადების შესახებ. მაგრამ რატომღაც ამ წესის გაგება არ უნდათ. ეს მათი პოლიტიკური დღის წესრიგია, მათ ჰქონდათ საშუალება, რომ კანონს გაცნობოდნენ დამუშავების პროცესში. სამუშაო ჯგუფში მოწვეული იყო პრეზიდენტის საპარლამენტო მდივანი. ის იცნობდა ყველა დეტალს.
გადაწყვეტილება პრეზიდენტმა ადმინისტრაციასთან ერთად უნდა მიიღოს მას შემდეგ, რაც კანონი სამივე მოსმენით იქნება მიღებული. ჩვენ რეალურ შენიშვნებს ვერ ვხედავთ, ვითავლისწინებთ საჯარო გამოსვლებში ხაზგასმულ შენიშვნებს, თუმცა, საბოლოო ჯამში მივიღეთ ოპტიმალური კანონი. ის ითვალისწინებს ადამიანის უფლებების დაცვის ნებისმიერ გამოწვევას. ამაზე უკეთესი და რეალობასთან შესაბამისი კანონი არ შეიძლებოდა მიღებული ყოფილიყო,”– განაცხადა მამუკა მდინარაძემ.
მანანა ღოღობერიძე
