პროკურორი, პროკურატურის საგამოძიებო ნაწილის უფროსის მოადგილე ჯარჯი წიკლაურის განცხადებით, გავრცელებული ინფორმაცია, ე.წ. ციანიდის საქმის პროკურატურის მიერ გაჭიანურებასთან დაკავშირებით, სიმართლეს არ შეესაბამება. ამის შესახებ წიკლაურმა ჟურნალისტებთან განაცხადა.
პროკურორმა ასევე აღნიშნა, რომ ადვოკატებისთვის თუ ძალიან მნიშვნელოვანი იყო ბრალდებულის ჩვენება, შეეძლოთ, მისი გამოკითხვა გამოძიებისთვის წარედგინათ.
“იმედია, ბრალდებული დღეს მაინც გასცემს შეკითხვებს პასუხს. ადვოკატების მხრიდან ამ თემაზე ატეხილი აჟიოტაჟი, თითქოს ჩვენ გავაჭიანურეთ დაკითხვა და აბსურდული ეჭვები, რომ შაბათ-კვირას ბრალდებულზე რაიმე ზეწოლა მოხდებოდა, არის მორიგი სიცრუე. ადვოკატებისთვის, თუ ასეთი მნიშვნელოვანი იყო ბრალდებულის ჩვენება, შეეძლოთ მისი გამოკითხვა და წარმოედგინათ გამოძიებისთვის”, – განაცხადა ჯარჯი წიკლაურმა.
გავრცელებული ინფორმაციით, მკვლელობის მცდელობაში ბრალდებულ გიორგი მამალაძეს პროკურატურა დღეს დაკითხავს.
10 თებერვალს მკვლელობის მომზადების ფაქტზე დეკანოზი გიორგი მამალაძე დააკავეს. მთავარი პროკურორის ინფორმაციით, აღნიშნულ ფაქტზე გამოძიება დაიწყო 2017 წლის 2 თებერვალს ერთ-ერთი მოქალაქის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა ციანიდის მოძიებაში დახმარება, რომლის გამოყენებითაც ამ უკანასკნელს უნდა მოეხდინა მაღალი იერარქიის სასულიერო პირის სიცოცხლის ხელყოფა.
მოგვიანებით, ბრალდებული დეკანოზის ადვოკატმა გაავრცელა ინფორმაცია, რომ გიორგი მამალაძისთვის წარდგენილ ბრალდებაში პატრიარქის მდივან-რეფერენტის შორენა თეთრუაშვილის სახელი ფიგურირებდა.
დეკანოზი გიორგი მამალაძე წარდგენილ ბრალდებაში თავს დამნაშავედ არ სცნობს.
