„საკონსტიტუციო სასამართლოს გადაწყვეტილება თითქოს შესრულდა. ჩემთვის პირადად მმართველი გუნდის განმარტებები დამაჯერებელი არ არის. გააკეთეს ყველაფერი ის, რაც სასამართლოს გადაწყვეტილებაში წერია, რომ არ უნდა გაკეთდეს“. ე.წ მოსმენების შესახებ კანონპროექტის ხარვეზებზე, ფონდ „ ევროპული ინიციატივა–ლიბერალური აკადემია თბილისის“ ხელმძღვანელმა, გაზეთ „რეზონანსის“ მთავარმა რედაქტორმა ლაშა ტუღუშმა „რუსთავი 2“–ზე, გადაცემა „კურიერის“ ეთერში ისაუბრა.
„ფაქტობრივად, ეს ახალი ინსტიტუტიც სუს-ის სამსახურის დაქვემდებარებაში დატოვეს, მხოლოდ სახელი გადაარქვეს. ის ფიქტიური მაკონტროლებელი სისტემები, რომელიც ვითომ შეიქმნა, ფიქტიური დამოუკიდებლობა, რომელიც ვითომ გააჩნია ამ სააგენტოს, არ იძლევა არანაირ გარანტიას, რომ არ განხორციელდეს იგივე ქმედებები, რაც ადრე ხორციელდებოდა. მნიშვნელოვანია ასევე ფიქტური საკადრო პოლიტიკა. ის ხალხი, რომელიც მუშაობდა ადრე, დღესაც მუშაობს იმავე სისტემაში.
ყველაფერი დარჩა იგივე, მთავარი დისკუსია უნდა ყოფილიყო საკითხზე, რა მექანიზმები არსებობს, როდესაც თვალთვალი იწყება. არსებობდა ორგასაღებიანი სისტემა, როდესაც საგამოძიებო სისტემა აპირებდა ფარული მიყურადების დაწყებას, მეორე გასაღები გააჩნდა ინსპექტორს. საკონსტიტუციო სასამართლომ თქვა, რომ ეს ორი გასაღები საკმარისი არ არის და დაამატეთ მექანიზმი, რომ კონტროლი უფრო ეფექტიანი გახდესო. ჩვენმა კანონმდებლებმა ეს გასაღები წაართვეს ინსპექტორს და შექმნეს ზოგადი, მითიური ორგანო. სუს–ი დარჩა ერთადერთი მაკონტროლებელი ინსტიტუტი.
დარწმუნებული ვარ, რომ ბუმერანგივით დაუბრუნდება იმ ხალხს, ვინც ამ კანონს ხელი აუწია, იმიტომ რომ პირველი სამიზნეები ეს ადამიანები გახდებიან და ამაში ცოტა ხანში თქვენ თვითონ დარწმუნდებით,“ – განაცხადა ლაშა ტუღუშმა.
მანანა ღოღობერიძე
Discussion about this post