„ეს მიმდევრობა არ არის პირველი, ბოლო 2–3 წლის განმავლობაში პრაქტიკულად ყოველთვის მარგველაშვილი არის პირველ ადგილზე და თითქმის იმავე ადგილზე მოდის კვირიკაშვილი“. „IRI“–ის კვლევის შედეგებზე, პოლიტიკის ექსპერტმა გია ხუხაშვილმა „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„ეს არის ნდობის რეიტინგი და არ არის მიბმული საარჩევნო მაჩვენებელზე. არ ნიშნავს, რომ 67 % უჭერს მხარს ამა თუ იმ ლიდერს. ეს შედეგები რეალურია და ასახავს საზოგადოების განწყობას. რაც შეეხება „IRI“–ის ნდობა არ ნდობას, ახლა არ არის საარჩევნოდ აქტიური პერიოდი, ამიტომ არც ერთ ორგანიზაციას არ აქვს მოტივი, რაიმე განწყობა ხელოვნურად შექმნას.
ეს რომ ყოფილიყო მოწონების რეიტინგი, შესაძლოა კვირიკაშვილი უფრო წინ ყოფილიყო. პრემიერმინისტრი მოსწონთ, როგორც პიროვნება. ის არის მშვიდი, მისი ტექნოლოგიები მისაღებია ადამიანისთვის, თუმცა, ის საერთოდ არ არის ლიდერი. გადაწყვეტილების ხარისხსაც აღარ აქვს მნიშვნელობა, კვირიკაშვილის მიმართ საზოგადოების განცდა, რომ დამოუკიდებლად იღებს გადაწყვეტილებებს, არ არსებობს.
სერგეენკო პრემიერმინისტრისგან განსხვავებით, თავის მიმართულებაში ჩანს,რომ იღებს გადაწყვეტილებებს და კონკრეტული შედეგებიც აქვს. დავით ბაქრაძის შემთხვევაში ეს უფრო „ნაციონალური მოძრაობის“ რეიტინგია. ის სახელმწიფოებრივ გადაწყვეტილებებს არ იღებს, შესაბამისად ხელისუფლებაში რომ ყოფილიყო ეს პარტია, ბაქრაძე იქნებოდა უფრო ქვემოთ, იქაც ვიღაცის ჩრდილში აღმოჩნდებოდა და ეს მას უკან გადაქაჩავდა“ , – განაცხადა გია ხუხაშვილმა.
მანანა ღოღობერიძე