„ბანკი რესპუბლიკისა“ და „თიბისი ბანკის“ გაერთიანება 6 მაისს დასრულდება. აღნიშნულთან დაკავშირებით „თიბისი ბანკი“ განცხადებას ავრცელებს.
განცხადების თანახმად, 6 მაისის შემდეგ მომხმარებელი „ბანკი რესპუბლიკის“ ბარათების ნაცვლად „თიბისი ბანკის“ ბარათებს გამოიყენებს. უფასოდ დამზადებული, ახალი ბარათების გატანა მათ „ბანკი რესპუბლიკის“ ფილიალებიდან შეეძლებათ.
განცხადების ტექსტს „თბილისი თაიმსი“ უცვლელად გთავაზობთ.
„თიბისი ბანკისა“ და „ბანკი რესპუბლიკის“ გაერთიანება 6 მაისს სრულდება, რის გამოც „ბანკი რესპუბლიკის“ ბარათების „თიბისი ბანკის“ ბარათებით ჩანაცვლება მიმდინარეობს. 6 მაისის შემდეგ უკვე მომხმარებელი „ბანკი რესპუბლიკის“ ბარათების ნაცვლად „თიბისი ბანკის“ ბარათების მოხმარებას განაგრძობს.
ყველა იმ მომხმარებელს, რომელსაც ჰქონდა რაიმე ტიპის ბარათი „ბანკ რესპუბლიკაში,“ უფასოდ დაუმზადდა იგივე ტიპის ბარათი „თიბისი ბანკში“, რომლის გატანა მათ „ბანკი რესპუბლიკის“ ფილიალებიდან შეუძლიათ. ინფორმაცია ბარათის ადგილმდებარეობის შესახებ კლიენტებს სმს შეტყობინების სახით ეცნობებათ. იმ შემთხვევაში, თუ მათ ჯერ არ მისვლიათ ასეთი შეტყობინება, შეუძლიათ მიმართონ ორივე ბანკის „ქოლცენტრს“ ნომერზე – 2 27 27 27.
„ბანკი რესპუბლიკის“ ბარათები „თიბისი ბანკის“ იმავე პირობების მქონე ბარათებით ჩანაცვლდება, რაც იმას ნიშავს, რომ მომხმარებლებს ბარათის მომსახურების საკომისიო არ შეეცვლებათ.
ნებისმიერ შემთხვევაში, გაიტანს თუ არა კლიენტი კუთვნილ ბარათს, „ბანკი რესპუბლიკის“ ყოფილი ბარათის შესაბამისი ანგარიში, მასზე არსებული ნაშთებით, ავტომატურად ინაცვლებს „თიბისი ბანკში“, რაც ნიშნავს, რომ „ბანკი რესპუბლიკის“ ბარათის შესაბამისი ანგარიში არსებობას განაგრძობს „თიბისი ბანკში“.
ბარათების დიდი რაოდენობიდან გამომდინარე, მოსალოდნელი რიგების თავიდან ასაცილებლად, „თიბისი ბანკი“ თხოვნით მიმართავს კლიენტებს, საკუთარი ბარათების ასაღებად ფილიალებს მაქსიმალურად დროულად მიმართონ“, – ნათქვამია განცხადებაში.
