„ეს ქიმიური თავდასხმა, ეს ინციდენტი რომ გასვლოდა ასადს და მის მთავარ მოკავშირე რუსეთს, ამ შემთხვევაში მძიმე სურათს მივიღებდით.რუსეთი ტერორისტი მოკავშირეების დახმარებით ეფექტურად დააშანტაჟებდა დანარჩენ ცივილიზებულ სამყაროს“. სირიაში ქიმიური თავდასხმის საპასუხოდ, აშშ–ის სამხედრო ჩარევაზე და სარაკეტო დარტყმებზე, ატლანტიკური საბჭოს ვიცეპრეზიდენტმა ბათუ ქუთელიამ „ტვ პირველზე“, გადაცემა „დიანა ტრაპაიძის დღის ამბების“ეთერში ისაუბრა.
„რუსეთი და მისი მოკავშირე წითელ ხაზსაც დაარღვევდა, რომელიც მასობრივი განადგურების იარაღის გამოყენებას გულისხმობს. ამას სამხედროს გარდა ჰქონდა ფსიქოლოგიური ეფექტი,როგორც ამერიკის, ასევე რუსეთის მოკავშირეებისთვის. ამ სამხედრო ჩარევის უკან ბუნებრივია იყო ემოციური ფონი. როდესაც ამერიკის შეერთებული შტატები იღებს სამხედრო ძალის გამოყენების გადაწყვეტილებას, ამის უკან დგას დიდი, კარგად აწყობილი,ინსტიტუციურად დაგეგმილი პროცედურა. გარდა ემოციური ფაქტორისა, მის უკან პრაგმატული და ზუსტი გათვლაა.
მსოფლიო ახალი გლობალური წესრიგის დამყარებას იწყებს, მისი კონტურები ახლა ყალიბდება და გარკვეულად აშშ–ის ლიდერობაზეც იქნება დამოკიდებული. ძველ წესრიგს რუსეთმა საკმაოდ ეფექტურად გამოუთხარა საფუძველი, პირველი ნაბიჯი იყო აგრესია საქართველოზე,როდესაც მან მოარღვია საერთაშორისო სამართლის ყველა პრინციპი. შემდეგ გააგრძელა უკრაინაში, სირიაში და ცდილობს ახალი თამაშის წესები შესთავაზოს მსოფლიოს.
რეალობები იცვლება, ამიტომ არ არის გასაკვირი, რომ ეს ნაბიჯი განსხვავდება ტრამპის საარჩევნო რიტორიკისგან. პრეზიდენტმა ობამამაც რუსეთთან გადატვირთვის პოლიტიკით დაიწყო და სანქციებით დაამთავრა. რუსეთი ასეთ კეთილ ჟესტებს არასწორად იგებს და ცდილობს თავის სასარგებლოდ გამოიყენოს“ , – განაცხადა ბათუ ქუთელიამ.
მანანა ღოღობერრიძე
