ჭკვიანი და ჯადოსნური ბეჭდის ხსენებისას, ალბათ ყოველ ჩვენგანს ფილმი „ბეჭდების მბრძანებელი“ გაახსენდება. უნიკალური ჯადოქრული სამყაროს შემქმნელ მწერლს, ჯონ რონალდ ტოლკინს ალბთ ვერც კი წარმოედგინა მის ფანტაზიას განხორციელება თუ ეწერა. რაოდენ გასაკვირიც არ უნდა იყოს, „ჯადოსნური“ ბეჭდის ამბავი რეალობად იქცა და ეს ყველაფერი ქართველი ახალგაზრდების დამსახურებაა. შესაძლოა გარკვეულ წილად მათი შთაგონების წყარო ტოლკინიც იყო, თუმცა მწერლისგან განსხვავებით მათ მართლაც შეძლეს „მაგიური“ ბეჭდის შექმნა, თანაც -არა ერთის.
თავისუფალი უნივერსიტეტის სტუდენტებმა ყოველდღიური დამქანცველი და რთული პროცედურებისგან თავის დასაღწევად შექმნეს ბეჭედი-რომელიც საშვთან ერთად მრავალი ფუნქიის მატარებელია. „CNICK“ ის ბეჭედია, რომლის საშუელებით ერთი ხელის მოსმით შეგიძლიათ უამრავი დრო დაზოგოთ. The Tbilisi Times მარკეტინგის დირექტორი ნინო გვაზავა ბეჭდის შექმნის იდიის, წარმატებასა და სამომავლო გეგმების შეასახებ ესაუბრა.
მოგვიყევით თქვენზე, როგორ გაგიჩნდათ იდეა შეგექმნათ „CNICK“?
– იდეა გაგვიჩნდა მაშინ, როდესაც ჯერ კიდევ უნივერსიტეტში ვსწავლობდით. ჩვენ თავისუფალი უნივერსიტეტის სტუდენტები ვართ და ყოველ ჯერზე შესვლისას გვჭირდებოდა საშვის გატარება.როდესაც ძალიან ბევრი წიგნი გიჭირავს ხელში საშვის ან ბარათის ძებნა განსაკუთრებით მოუხერხებელია. ჩვენ გვინდოდა, შეგვექმნა რაღაც ისეთი მექანიზმი, რაც გაგვიმარტივებდა ამ რთულ პროცესს. გვინდოდა, ხელის ერთი მოსმით შევსულიყავით უნივერსიტეტში და არ დაგვჭირვებოდა ზედმეტი პროცედურები და დროის კარგვა. სწორედ ამიტომ პირველი ნივთი რაც დავამზადეთ ეს იყო ბეჭედი, რომელსაც ჰქონდა საშვის ფუნქცია. თუმცა, მას შემდეგ რაც შევძელით ბეჭედისთვის ამ შესაძლებლობის მიცემა,დავინახეთ, რომ გარდა საშვებისა შეგვეძლო ბეჭდისთვის კიდევ ბევრი სხვა ფუნქციის მინიჭება.
მოგვიყევით „CNICK-ის“ შეასძლებლობების შესახებ, რა შეუძლია ბეჭედს?
– CNICK შეგიძლიათ გამოიყენოთ სამსახურის საშვის, ფიტნესისა და აუზის აბონიმენტების ან სულაც კინოს ბილეთების ნაცვლად. მათი მიმაგრება და ჩატვირთვა ძალიან მარტივია, მხოლოდ რამდენიმე წამი დასჭირდება, რომ იგივე ინფორმაცია ბეჭედში ჩატვირთონ. გარდა ამისა, რაც მთავარია, CNICK ზრუნავს მომხმარებლის უსაფრთხოებაზე, მასში ჩატვირთულია პირველადი სამედიცინო ინფორმაცია, რომელიც სასწრაფო დახმარების ექიმებს შესაძლებლობას აძლევს მომენტალურად მიიღონ ინფორმაცია პაციენტის შესახებ, მაშინ როდესაც თითოეული წამი გადამწყვეტია. CNICK მომხმარებლებს მობილურ აპლიკაციასაც სთავაზობს, რომელიც NFC-ის მეშვეობით შესაძლებლობას იძლევა სასურველი ფაილები შევინახოთ ბეჭედში და გავუზიაროთ სხვას ხელის ერთი შეხებით. ასევე ტელეფონიდან მომხმარებელს შეუძლია ბეჭედში ჩაწეროს ნებისმიერი ვიდეო, მაგალითად საინტერესო მოგონებები და აჩუქოს საყვარელ ადამიანს.
რა მასალას იყენებთ ბეჭდის დასამზადებლად?
– ბეჭდები მზადდება ეგზოტიკური ხისგან. უცხოეთიდან ვიღებთ მასალებს და საქართველოში ვამზადებთ. დამზადების ტექნოლოგიაც განსხავებულია. სპეციალური დანადგარით, ვიღებთ თხელ და მსუბუქ ბეჭედს, რომელიც ძალიან მყარია, არის წყალგამძლე და არ ზიანდება.
რამდენად ინოვაციურია ეს წამოწყება და არის თუ არა მსგავსი ბეჭედი მსოფლიოს მასშტაბით?
– საქართველოში მსგავსი ბეჭედი ინოვაციაა. ხოლო მსოფლიოს მასშტაბით რამდენიმე კონკურენტი გვყავს. ფუნქციურად „CNICK“ სრულიად ინოვაციური და განსხვავებულია მთელს მსოფლიოში.
როგორი იქნება ფასები და რამდენად ხელმისაწვდიმი იქნება მისი შეძენა?
– საბოლოო ფასებს რამდენიმე დღეში გაიგებთ. თუმცა, იმის თქმა შემიძლია, რომ ფასები 100 ლარის ფარგლებში იქნება.
თანამშრომლობთ თუ არა ქართულ სტარტაპ კომპანიებთან?
– დაახლოებით ორი წელია უკვე, რაც ამ იდეაზე ვმუშაობთ და აქედან მოყოლებული რამდენიმე სტარტაპ კონკურსშიც მივიღეთ მონაწილეობა. ათამდე მათგანში გავიმარჯვეთ კიდევაც. მათ შორის ყველაზე მნიშვნელოვანი იყო სტარტაპ საქართველო, რომელიც გასულ ზაფხულს მოვიგეთ. მოგებულმა თანხამ მოგვცა საშუალება, რომ რეალურად ჩამოგვეყალიბებინა დეტალები და განგვევითარებინა ბეჭედი. ამასთანავე ძალიან ბევრ კომპანიასთან ვთანამშრომლობთ პარალელურად. უცხოეთშიც გვყავს პარტნიორები, რომლებიც სხვადსხვა საჭირო დეტალებს გვაწვდიან, ჩვენზე მორგებულ ნაწილებს ამზადებენ და შემდეგ ეს ყველაფერი უკვე საქართველოში მზადდება.
როდის გამოჩნდება „CNICK“ ქართულ ბაზარზე და სად იქნება მისი შეძენა შესაძლებელი?
– ჯერჯერობით ჩვენი ბეჭდების შეძენა ჩვენს საიტზე იქნება შეასძლებელი. პრეზენტაცია აპრილის ბოლოს გაიმართება და ჩვენი ბეჭდებიც მას შემდეგ გავა ქართულ ბაზარზე. ვგეგმავთ პირველ მომხარებლებს სიურპრიზები და წახალისებები გავუკეთოთ.
მარიამ ლეკიაშვილი
