„კონსტიტუციაში ევროატლანტიკური კურსის ჩაწერა ჩვენი ინიციატივა იყო, ეს არის განაცხადი იმისა, რომ საქართველოს კურსი არის დასავლეთი და არა ჩრდილოეთი. ეს უნდა აისახოს კონსტიტუციაში და აუცილებელია ყველა კონსტიტუციურმა ორგანომ გააკეთოს ყველაფერი იმისთვის, რომ ეს მოხდეს“. ამის შესახებ არასამთავრობო ორგანიზაცია “საერთაშორისო გამჭვირვალობა-საქართველოს” აღმასრულებელმა დირექტორმა, ეკა გიგაურმა „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„დასავლეთი და დასავლურ ორგანიზაციებში გაწევრიანება არ არის მხოლოდ წევრობა, აქ მნიშვნელოვანია ღირებულებები,რომელსაც საქართველოს სახელმწიფო უნდა იზიარებდეს, რომელიც უკავშირდება სამართლიან სასამართლოს, ადამიანის უფლებების დაცვას, სამართლიან საარჩევნო სისტემას. არ წერია კონკრეტულად ნატო და ევროკავშირი, იგულისხმება ზოგადად ის ორგანიზაციები, რომლებიც გულისხმობს დასავლური ღირებულებების გარშემო ქვეყნების გაერთიანებას.
არასამთავრობო სექტორისთვის ეს არის დამატებითი ბერკეტი იმისთვის, რომ კონკრეტულ რეფორმასთან დაკავშირებით მოთხოვნა გვქონდეს და ნებისმიერ ინიციატივას შევხედოთ იმ კუთხით, ეთანხმება თუ არა ევროპულ სტანდარტებს და პოლიტიკურ კურსს. დღეს რუსეთის გავლენები უფრო და უფრო შესამჩნევი ხდება და კონსტიტუციაში ის გამოწვევებიც უნდა იყოს ასახული, რაც ქვეყანას აქვს. რუსეთისთვის ეს ნამდვილად იქნება უსიამოვნო ფაქტი“ , – განაცხადა ეკა გიგაურმა.
მანანა ღოღობერიძე
