სოზარ სუბარი ირანის ელჩს საქართველოში შეხვდა

სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი ირანის ისლამური რესპუბლიკის ელჩს საქართველოში აბას თალებიფარს შეხვდა.

სასჯელაღსრულების სამინისტროს ინფორმაციით, ელჩმა მინისტრს დახმარება სთხოვა საქართველოს სასჯელაღსრულების დაწესებულებებში მყოფი ირანის მოქალაქეების გადაცემის პროცესში.

როგორც ელჩმა განაცხადა, ქვეყნებს შორის ექსტრადიციისა და დამნაშავეთა გადაცემის შესახებ ხელშეკრულება არ არსებობს. მისივე თქმით, ირანსა და საქართველოს შორის ასევე არ არსებობს სამართლებრივი დახმარების შესახებ ხელშეკრულება, რაც ორი ქვეყნის სამართლებრივ ურთიერთობას დიდ დახმარებას გაუწევდა.

ელჩმა აღნიშნა, რომ ბევრი ირანელი პატიმარი ამნისტიით და სამინისტროს რეკომენდაციით სასჯელისაგან გათავისუფლდა.

ამჟამად, საქართველოს სასჯელაღსრულების სისტემაში სულ, ირანის 9 მოქალაქე იხდის სასჯელს. ელჩის ინფორმაციით, სასჯელს ძირითადად, ყალბი დოკუმენტების გამოყენების გამო იხდიან, ასევე არიან მსჯავრდებულები ეკონომიკურ დანაშაულში, ნარკოდანაშაულში, მკვლელობაში და თაღლითობაშიც.
რაც შეეხება ირანელი პატიმრების მდგომარეობას, ელჩის განცხადებით, მათ თითქმის ყოველთვიურად ნახულობენ და ამ შესაძლებლობის გამო სასჯელაღსრულების, პრობაციისა და იურიდიული დახმარების საკითხთა სამინისტროს მადლობას უხდის.

“პატიმრები ჯანმრთელობასთან და ჰიგიენასთან დაკავშირებით სასჯელაღსრულების თანამშრომლების მუშაობას არ უჩივიან. რამდენჯერაც შევედით ჩვენი პატიმრების მოსანახულებლად მათი მხრიდან რაიმე პრეტენზია არ წამოსულა,”- განაცხადა აბას თალებიფარმა.

ელჩის ინფორმაციით, ირანის სასჯელაღსრულების დაწესებულებებში საქართველოს არ ცერთი მოქალაქე არ იმყოფება.

რაც შეეხება ელჩის განცხადებას ირანელი პატიმრების გათავისუფლების სხვა მექანიზმებთან დაკავშირებით, მინისტრმა განმარტა, რომ მსჯავრდებულთა გათავისუფლება შესაბამისი კრიტერიუმების დაკმაყოფილების შემთხვევაში ხდება და როგორც კი კანონი ამის შესაძლებლობას იძლევა, სამინისტროს მხრიდან არანაირი დაბრკოლება არ იქმნება.

სოზარ სუბარმა ირანის ელჩს ინფორმაცია მიაწოდა პატიმართა რაოდენობასთან და სიკვდილიანობასთან დაკავშირებითაც.
მინისტრის განცხადებით, საქართველო პატიმართა რაოდენობით მსოფლიოში მეორე ადგილზე იყო.

“10 000 მოსახლეზე 600 პატიმარი მოდიოდა. 6-7 წელიწადში, 2004 წლიდან 2011 წლამდე, 400 პროცენტით გაიზარდა პატიმართა რაოდენობა. 6 000-დან 24 500 -მდე გაიზარდა მათი რიცხვი. დღესაც კი, როდესაც ამნისტიით და სხვა მექანიზმებით პატიმრობიდან 60 პროცენტი გათავისუფლდა, საქართველო მაინც ერთ-ერთი მაღალი მაჩვენებლის მქონე ქვეყანად ითვლება ევროპაში პატიმართა რაოდენობის მხრივ. ევროპის ხუთ ქვეყანაში შევდივართ პატიმართა მაღალი მაჩვენებლით. პატიმართა დიდ რაოდენობას ემატებოდა წამება, არაადამიანური მოპყრობა, ჯანმრთელობის პრობლემები, რაც იწვევდა პატიმართა სიკვდილიანობას. მდგომარეობა ახლა მკვეთრად გამოსწორდა. ყოველ 10 000 პატიმრიდან 60 გარდაცვალების ფაქტი იყო, ახლა კი ეს რიცხვი 20-მდე შემცირდა”,” – განაცხადა სოზარ სუბარმა.

10.09.13