თბილისის მერია საზოგადოებრივი საპირფარეშოების მოსაწყობად აუქციონს უახლოეს მომავალში გამოაცხადებს. ინფორმაციას ქალაქის მერია ავრცელებს. მიწის ნაკვეთები საპირფარეშოების მოსაწყობად 20-წლიანი სარგებლობის უფლებით გაიცემა. პირველ ეტაპზე ქალაქში 30 საპირფარეშო აშენდება.
აუქციონის პირობების თანახმად, საზოგადოებრივი საპირფარეშო ადაპტირებული უნდა იყოს შეზღუდული შესაძლებლობების მქონე პირებისთვის, როგორც ტექნოლოგიური მოწყობილობით, ისე ფართით. საინფორმაციო წარწერებზე კი გათვალისწინებული უნდა იყოს ბრაილის შრიფტი.
საზოგადოებრივი საპირფარეშო, ასევე, აღჭურვილი უნდა იყოს ბავშვის გამოსაცვლელი მაგიდით, რომელიც სპეციალური, ანტიბაქტერიული მასალით იქნება დამზადებული.
აუქციონში გამარჯვებული ვალდებულებას აიღებს საზოგადოებრივი საპირფარეშოს მოვლა-პატრონობასა და სანიტარულ-ჰიგიენური პირობების დაცვაზე. მოიჯარე, ასევე, ვალდებული იქნება, უზრუნველყოს ცხელი ხაზის მუშაობა კვირაში 7 დღის განმავლობაში, 24-საათიანი სამუშაო რეჟიმით.
საზოგადოებრივი საპირფარეშო იფუნქციონირებს ნაღდ ანგარიშსწორებაზე, ან/და სპეციალურ ბარათებზე (მაგ. „მეტრომანი“). საზოგადოებრივი საპირფარეშოს გარე ფასადის გამოყენება შესაძლებელია ჩაშენებული ბანკომატის, გადახდის აპარატის ან სხვა აპარატურის დასამონტაჟებლად.
