1 მაისს, თბილისის ვ. სარაჯიშვილის სახელობის სახელმწიფო კონსერვატორიას
დაარსებიდან 100 წელი უსრულდება.
იუბილესთან დაკავშირებით, 18:00 საათზე, დიდ დარბაზში კონსერვატორიის 100 წლისთავისადმი მიძღვნილი ფესტივალი გაიხსნება. ფესტივალს თბილისის ვანო სარაჯიშვილის სახელობის სახელმწიფო კონსერვატორიის სტუდენტური სიმფონიური ორკესტრი და გუნდი გახსნის; დირიჟორი – მირიან ხუხუნაიშვილი. ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე დაესწრება.
ფესტივალი, რომელიც მაისის ბოლომდე გაგრძელდება, 15 ღონისძიებას მოიცავს, მათ შორის „კონსერვატორიის საიუბილეო გალა-კონცერტი მიძღვნილი საქართველოს დამოუკიდებლობის დღისადმი“, რომელიც 26 მაისს ოპერისა და ბალეტის თეატრში გაიმართება.
თბილისის კონსერვატორია, მთელ ამიერკავკასიაში, პირველი უმაღლესი სასწავლებელია. ოფიციალურად იგი 1917 წლის 1 მაისს გაიხსნა. 1924 წელს მას სახელმწიფო კონსერვატორიის სტატუსი მიენიჭა, ხოლო 1947 წლიდან იგი ქართველი მომღერლის ვანო სარაჯიშვილის სახელს ატარებს.
ფესტივალი საქართველოს კულტურისა და ძეგლთა დაცვის სამინისტროს მხარდაჭერითა და საქართველოს პრემიერ-მინისტრის პატრონაჟით იმართება. ფესტივალის მხარდამჭერია: თიბისი ბანკი. საინფორმაციო მხარდამჭერები: რუსთავი 2, არტარეა, საქართველოს საზოგადოებრივი მაუწყებელი.
