ევროპის გაფართოებისა და სამეზობლო პოლიტიკის საკითხებში ევროკომისარმა-შტეფან ფულემ, განცხადება გააკეთა რუსეთის მიერ აღმოსავლეთ პარტნიორობის ქვეყნებზე განხორციელებულ ზეწოლასთან დაკავშირებით.
ბატონო თავმჯდომარევ, პატივცემულო პარლამენტის წევრებო, ვილნიუსში დაგეგმილი აღმოსავლეთ პარტნიორობის სამიტი გვიახლოვდება. მოველით, რომ სამიტზე მნიშვნელოვანი ნაბიჯები გადაიდგმება აღმოსავლეთ ევროპის რამდენიმე მეზობელთან პოლიტიკური ასოცირებისა და ეკონომიკური ინტეგრაციის მიმართულებით. ზოგან ეს აშკარა საფრთხედ აღიქმება და ეს აღქმა მცდარია, თუმცა, ამის გამო ჩვენს ზოგიერთ პარტნიორზე უზარმაზარი ზეწოლა ხორციელდება.
ევროკავშირი ყოველთვის მკაფიოდ გამოხატავდა საკუთარ პოლიტიკას აღმოსავლეთ
მეზობლების მიმართ. საერთო ინტერესები გვკარნახობს, რომ ჩვენს კონტინენტზე
კეთილდღეობისა და სტაბილურობის სივრცის შესაქმნელად აღმოსავლეთ მეზობლებთან ერთად უნდა ვიმუშავოთ. უკვე არსებული, 1994 წ. ხელმოწერილი “შეთანხმებები პარტნიორობისა და თანამშრომლობის შესახებ” ითვალისწინებდა თავისუფალი ვაჭრობის სივრცის განვითარების პერსპექტივას.
2004 წელს დაწყებულმა წინასწარმა კვლევებზე დაყრდნობით შემუშავდა “ღრმა და ყოვლისმომცველი თავისუფალი სავაჭრო სივრცე” (DCFTA), რომელიც შემდგომში გახდა შემადგენელი ნაწილი “ახალი გაღრმავებული შეთანხმებებისა”. ეს შეთანხმებები მოგვიანებით “ასოცირების შესახებ შეთანხმებების” (AA) სახელით გახდა ცნობილი.
მოლაპარაკებები პირველი “ღრმა და ყოვლისმომცველი თავისუფალი სავაჭრო სივრცის” თაობაზე დაიწყო 2008 წელს უკრაინასთან, ამ ქვეყნის ვაჭრობის მსოფლიო ორგანიზაციაში გაწევრიანებისთანავე.
ევროკომისიის 2008 წლის კომუნიკაციამ საფუძველი ჩაუყარა იმ შეთავაზებას, რომელიც მოგვიანებით, 2009 წლის პრაღის სამიტზე, ჩვენს აღმოსავლეთ პარტნიორებზე გავრცელდა და რომელიც ადასტურებდა პოლიტიკური გაერთიანებისა და ეკონომიკური ინტეგრაციის განმტკიცების ერთობლივ ამოცანას “ღრმა და ყოვლისმომცველი თავისუფალი სავაჭრო სივრცისა” და”ასოცირების შესახებ” შეთანხმებებზე დაყრდნობით.
ევროპარლამენტი თავიდანვე აქტიურად უჭერდა მხარს ამ მიდგომას, რომელიც ევროპის ამ ნაწილის პოლიტიკური, ისე ვაჭრობის კუთხით გარდაქმნას ისახავდა მიზნად.
13.09.13