თბილისში ქალაქის დანაგვიანებისთვის 20 აპრილიდან დღემდე 1343 ადამიანი დაჯარიმდა. ჯარიმის რაოდენობა 143 950 ლარს შეადგენს. ამის შესახებ ინფორმაციას “თბილსერვისი” ავრცელებს.
“თბილსერვისის” ცნობით, 1 343 სამართალდამრღვევი პირიდან 616 უცხო ქვეყნის მოქალაქეა. დღეის მდგომარეობით, სხვადასხვა სახის ნარჩენით გარემოს დანაგვიანებისთვის დაჯარიმებულია 1 294 ფიზიკური და 49 იურიდიული პირი.
„თბილსერვის ჯგუფის“ ზედამხედველობის სამსახურის ქვეითი ინსპექტორები დედაქალაქის ქუჩებში, 2017 წლის 3 აპრილიდან გამოჩნდნენ. პირველი ორი კვირის განმავლობაში მათ გამოჩენას ინფორმაციული სახე ჰქონდა, ხოლო დაკისრებული უფლებამოსილების ფარგლებში, ქვეითმა ინსპექტორებმა საჯარიმო ოქმების შედგენა 20 აპრილიდან დაიწყეს.
ამასთან, ქვეითი ინსპექტორების გარდა, „თბილსერვის ჯგუფის“ ზედამხედველობის სამსახური დედაქალაქის მასშტაბით პერმანენტულ ინსპექტირებას ეკიპაჟების სახითაც ახორციელებს.
ქვეითი ინსპექტორების მიერ საყოფაცხოვრებო ნარჩენით გარემოს დანაგვიანების ფაქტები, ძირითადად, ხალხმრავალ და ტურისტულ ზონებში, ასევე ბაღებსა და სკვერებში ვლინდება.
