ჩინეთის სამხედრო გემი ბალტიის ზღვაში რუსულ სამხედრო გემებთან ერთად წვრთნებს გადის. ინფორმაცია უკვე დაადასტურეს რუსეთისა და ჩინეთის თავდაცვის მინისტრებმა. სწავლების პროცესში ჩინელი და რუსი სამხედროები გადიან წვრთნებს წყალქვეშა და საჰაერო თავდაცვაში.
ჩინეთმა ბოლო პერიოდში რამდენიმე სამხედრო გემი გაუშვა მსოფლიოს სხვადასხვა რეგიონში სამხედრო წვრთნებზე. ბუნებრივია ეს ქმედებები არ გამორჩენია ნატოს. ბრიტანულმა, დანიურმა და ნიდერლანდების სამეფოს გაერთიანებული ფლოტმა დაზვერვები დაიწყო. მათი თქმით, ბალტიის ზღვაში განლაგებული გემები წვრთნებს ნამდვილად გადიან.
ექსპერტების თქმით, ჩინური სამხედრო ფლოტის გამოჩენა ბალტიის ზღვაში შემთხვევითი არ არის და ის შეიძლება ითქვას, სიმბოლურ ხასიათსაც ატარებს. ვინაიდან, ეს ტერიტორია რუსეთისა და აშშ-ს დიპლომატიური დაპირისპირების მნიშვნელოვან საგანს წარმოადგენს, ჩინეთი ამ ნაბიჯით აჩვენებს აშშ-ს,რომ ის რუსეთს უჭერს მხარს და აქვს შესაძლებლობა ჩაერიოს მათ შორის.
ნატოში აცხადებენ რომ ჩინეთმა იცის,რომ მას ეკონომიკური მნიშვნელობის როლი აქვს მსოფლიოში, თუმცა საკუთარ თავს არ უნდა მისცეს იმის ნება,რომ პროვოკაციული მოქმედებები განახორციელოს. International Security at the Atlantic Council – ის დირექტორის, მაგნუს ნორდენმანის თქმით, ჩრდილოეთ ევროპამ უნდა შეზღუდოს ჩინეთისთვის პორტებზე თავისუფლად შესვლის შესაძლებლობა.
განსხვავებული აზრი აქვთ სხვა ექპსერტებს,რომლებიც ვერაფერს საგანგაშოს ვერ ხედავენ ამ შემთხვევაში. მათი თქმით, ეს უბრალოდ წვრთნაა, რომლებიც სხვა სამომავლო ერთობლივი საქმიანობებისთვის კეთდება. ისინი იხსენებენ ჩინეთისა და რუსეთის საზღვაო ფლოტების ერთობლივ სამხედრო ოპერაციებს 2010 წელს,როდესაც მათ სომალის ნაპირებთან მეკობრეობის წინააღმდეგ პატრულირება დაიწყეს და ადენის ყურედან წარმატებით მოახდინეს 18 სავაჭრო გემის ესკორტირება.
აშშ-ში ფიქრობენ რომ ჩინეთის ეს ნაბიჯი აშშ-ს მიერ სამხრეთ ჩინეთის სადავო წყლებში საზღვაო ფლოტის შეყვანას მოჰყვა. ჩინეთის გაღიზიანება თეთრი სახლის პრესპიკერის მიერ გაკეთებულ განცხადებას მოჰყვა,როდესაც შონ სპაისერმა თქვა,რომ ამერიკა „საერთაშორისო ტერიტორიებს დაიცავს“, მათ შორის სამხრეთ ჩინეთის ზღვას. მისი თქმით, შეერთებული შტატები ამ ტერიტორიების დასაკუთრებაში ჩინეთს წინ აღუდგება. ჩინეთის ოფიციალური პოზიცია აღნიშნულ საკითხთან დაკავშირებით ისაა,რომ აშშ-მ უნდა შეწყვიტოს „სხვის საქმეში ჩარევა, რადგან შეერთებული შტატები სამხრეთ ჩინეთის ზღვის საკითხში მონაწილე მხარე არ არის“, ნათქვამი იყო პეკინში საგარეო საქმეთა სამინისტროს პრესსპიკერის მიერ გაკეთებულ განცხადებაში.
წყარო: cnn.com