ბორჯომის გამგებლის, დიმიტრი ყიფიანის ინფორმაციით, ბორჯომის პოლიცია მესხიძეების ოჯახის ევაკუაციის ფაქტს ადასტურებს. ცოტა ხნის წინ გავრცელდა ინფორმაცია, რომ სოფელ დაბაში მცხოვრები ოჯახი ხელისუფლებას დახმარებას სთხოვდა.
1tv-ს ინფორმაციით, სოფელ დაბაში რამდენიმე ოჯახი სახლებს ტოვებს.
„სახლი იმიტომ დავტოვეთ, რომ უკვე ნაკვერჩხლები ცვივა ეზოში და აშკარად ფერფლი მოდის. მთელმა ოჯახმა დავტოვეთ სახლი. ჯერ აქ ვართ და მერე არ ვიცი, რა იქნება. ხანძარი 500 მეტრშია. ცეცხლი მთელი დღის განმავლობაში იყო. კვამლის სუნიც იგრძნობა“, – წერს 1tv ადგილობრივ მცხოვრებზე დაყრდნობით.
შსს-ის ცნობით, ცუდი ხილვადობის, დაკვამლიანებისა და ძლიერი ქარის გამო, სპეციალისტების რეკომენდაციით, ვერტმფრენებმა მუშაობა დროებით შეწყვიტეს. უწყებაში აცხადებე, რომ როგორც კი რეკომენდაცია იქნება, ვერტმფრენი ხანძრის ჩაქრობის პროცესში ისევ ჩაერთვება.
ბორჯომის ხეობაში, სოფელ დაბას მიმდებარე ტერიტორიაზე ხანძარი გუშინ დღისით გაჩნდა. ძლიერი ქარის გამო ხანძრის ლოკალიზება ამ დრომდე ვერ ხერხდება.