განათლებისა და მეცნიერების მინისტრმა ალექსანდრე ჯეჯელავამ ახალი სასწავლო წლის დაწყება სკოლის მოსწავლეებსა და პედაგოგებს თბილისის 143-ე საჯარო სკოლიდან მიულოცა. მინისტრის ინფორმაციით, გასულ წელთან შედარებით სკოლებში პირველკლასელთა რაოდენობა გაიზარდა. მისივე თქმით, საჯარო სკოლები ახალ სასწავლო წელს ბევრი მნიშვნელოვანი სიახლით შეხვდნენ.
„პირველ რიგში, ეს არის ძალიან მასშტაბური ინფრასტრუქტურული ცვლილებები, თითქმის 300-ზე მეტი სკოლა მოსწავლეებს გალამაზებული, მოწესრიგებული და დასუფთავებული დახვდება. მნიშვნელოვანი სიახლეა ექვსი სრულიად ახალი სკოლა. ჩვენს ქვეყანაში დიდი ხნის განმავლობაში სკოლები არ აშენებულა, ბოლო პერიოდში ეს პროცესი დაიწყო. გასამმაგდა იმ პედაგოგების რაოდენობა, რომლებიც პროფესიული განვითარების პროცესში ჩაერთვნენ, რაც ნიშნავს, რომ მოსწავლეებს უფრო მოტივირებული და უკეთ მომზადებული პედაგოგები დახვდებათ“, – განაცხადა მედიასთან საუბრის დროს ჯეჯელავამ.
