საფრანგეთის ყოფილი პრემიერ-მინისტრი, ბორდოს მერი ალან ჟუპე დემოკრატიული განვითარების გზაზე საქართველოს მიერ მიღწეულ პროგრესს მიესალმება, – ამის შესახებ ალან ჟუპემ საქართველოს პრემიერ-მინისტრ გიორგი კვირიკაშვილთან შეხვედრისას განაცხადა.
პრემიერმა ბორდოს მერს მადლობა გადაუხადა იმისთვის, რომ საქართველოს მიეცა შესაძლებლობა, ყოფილიყო პირველი ქვეყანა – “მოწვეული ვენახი”, რომელიც ღვინის ცივილიზაციის ცენტრში ქართული ღვინის განსაკუთრებულ სახეობებს მსოფლიოს წარუდგენს. გიორგი კვირიკაშვილმა ალან ჟუპე საქართველოში მიიწვია.
ბორდოს მერმა საუბრისას, ასევე გაიხსენა საქართველოს პრემიერ-მინისტრის ვიზიტი “ღვინის ცივილიზაციის ქალაქის” ინაუგურაციაზე და მას ამ ინიციატივის მხარდაჭერისთვის მადლობა გადაუხადა.
შეხვედრა ბორდოში, ღვინის მსოფლიო ცივილიზაციის ცენტრში, ქართული გამოფენის – “საქართველო – მეღვინეობის აკვანი” გახსნის შემდეგ გაიმართა.
