თბილისში მდებარე დემირელის სახელობის კერძო კოლეჯი დაიხურა. ამ საკითხთან დაკავშირებით განცხადება – განათლების სამინისტროს საზოგადოებასთან ურთიერთობის სამსახურის ხელმღვანელმა, ნატა ასათიანმა გააკეთა.
„დემირელის კოლეჯს ჰქონდა დარღვევები, თუმცა, ამავდროულად, ძალიან კარგი მოსწავლეები და კომპეტენტური მასწავლებლები ჰყავდა. ჩვენ ყველა პირობას შევქმნით, რომ მათი სხვა სკოლებში გადანაწილების პროცესი მაქსიმალურად უმტკივნეულოდ წარიმართოს. რამდენიმე კერძო სკოლასთან ვაწარმოებთ მოლაპარაკებებს, მათ უკვე გამოთქვეს მზაობა, რომ მიიღონ დემირელის კოლეჯის მოსწავლეები და მასწავლებლები. გადაწყვეტილების შესახებ საზოგადოებას უმოკლეს პერიოდში ვაცნობებთ“-აღნიშნა ასათიანმა.
The Tbilisi Times აღნიშნული საკითხის გადასამოწმებლად, დემირელის სახელობის კერძო კოლეჯის დირექტორს, ნინო კავთიაშვილს დაუკავშირდა.
,, მოგახსენებთ, რომ დემირელის სახელობის კერძო კოლეჯს ავტორიზაციის ვადა მიმდინარე წლის აგვისტოს ბოლოს ეწურებოდა, ჩვენ აპრილის თვეში შევიტანეთ განაცხადი, შესაბამისი პროცედურების გავლის შემდეგ დემირელის კოლეჯს უარი ეთქვა ავტორიზაციის მიღებაზე. ამ შემთხვევაში სკოლა 1 წლის ვადით კარგავს საგანმანათლებლო საქმიანობის უფლებას. როგორც გაირკვა, ავტორიზაციის მოპოვებისთვის საჭირო სამივე სტანდარტი: მატერიალურ–ტექნიკური რესურსი, ადამიანური რესურსი და სასწავლო – დაგვიწუნეს. რა თქმა უნდა, არის მთელი რიგი საკითხები, რასაც ვერ გავიზიარებთ და არ ვეთანხმებით. მთავარი მიზეზი, რასაც სკოლას ედავებიან, არის უცხოელი მოსწავლეების საკითხი. დემირელის კოლეჯში ქართველ მოსწავლეებთან ერთად განათლებას უცხოენოვანი მოსწავლეებიც ეუფლებოდნენ. ფიქრობენ, რომ უცხოელი მოსწავლეები ქართულად საგნებს ვერ დაძლევდნენ. მინდა ვთქვა, რომ ყველა უცხოელი მოსწავლე კანონის სრული დაცვით ჩავრიცხეთ და სწავლა–განათლებასაც კანონმდებლობით დადგენილი წესით იღებდნენ. კოლეჯის დახურვა მოსწავლეებმა ძალიან განიცადეს. მოსწავლეებისა და მშობლების მხრიდან ამას აქციებიც მოჰყვა. ამჟამად, დემირელის კოლეჯის მოსწავლეების სხვა სკოლებში გადანაწილების პროცესი მიმდინარეობს. ამ ეტაპზე, ვაპირებთ, გამოვიყენოთ კანონმდებლობით მონიჭებული გასაჩივრების უფლება, რათა ბათილად იქნას ცნობილი ზოგადსაგანმანათლებლო დაწესებულების ავტორიზაციის საბჭოს გადაწყვეტილება” – განაცხადა კოლეჯის დირექორმა ნინო კავთიაშვილმა.
ნინო ზარიძე
