საქართველოში კიდევ ერთი ტურისტული ზონის მოწყობა იგეგმება. ხის კენწეროების ბილიკი კავკასიის მასშტაბით, პირველად, ლაგოდეხში მოეწყობა.
“ბუნების დაცვის მსოფლიო ფონდის” (WWF) კავკასიის წარმომადგენლობამ, ლაგოდეხის დაცულ ტერიტორიაზე, ხის კენწეროების ბილიკის (Tree Top Trail) ტექნიკური განხორციელებადობის შესაძლებლობების კვლევაზე, დიზაინსა და დეტალურ პროექტირებაზე საერთაშორისო ტენდერი უკვე გამოაცხადა.
ტენდერი გერმანიის ეკონომიკური თანამშრომლობისა და განვითარების სამინისტროს და რეკონსტრუქციისა და განვითარების ბანკის საშუალებით ფინანსდება.
ტენდერში მონაწილე კომპანიამ ხის კენწეროების ბილიკის პროექტის ტექნიკური განხორციელების შესაძლებლობები უნდა შეისწავლოს, ასევე, პროექტის დეტალური გეგმა და დიზაინი შეიმუშაოს. კვლევა ,აგრეთვე, მომსახურების გაიდლაინების შედგენას, ვიზიტორთა სავარაუდო რაოდენობის, შემოსავლების, საჭირო საოპერაციო, სარემონტო ხარჯების და პროექტის განხორციელებით ეკონომიკაში შეტანილი სავარაუდო წვლილის დაანგარიშებასაც მოიცავს.
თავდაპირველად, ბილიკები ტყის ზედა ნაწილის სამეცნიერო კვლევის მიზნით კეთდებოდა, დღეს კი, ეკოტურიზმის შემადგენელი ნაწილიც არის, რომელიც მსოფლიოში სულ უფრო პოპულარული ხდება. ბილიკების საშუალებით დამთვალიერებლები ტყის კომპლექსურ ეკოსისტემას – ტყის ბინადარ ცხოველებს, ფრინველებს, მწერებს, სოკოებს და მრავალფეროვან ფლორას ეცნობიან.
ყველაზე ცნობილი ხის კენწეროების ბილიკები გერმანიაში, დიდ ბრიტანეთში, განაში, მალაიზიასა და ავსტრალიაშია.
ნინო ზარიძე