ქართულ ბაზარზე სანათებისა და ავეჯის მწარმოებელი კიდევ ერთი კომპანია გამოჩნდა. “JK STUDIO” მომხმარებელს ბუნებრივი ხისა და მეტალისგან დამზადებულ ნივთებს სთავაზობს გამორჩეული და განსხვავებული დიზაინით.
“JK STUDIO”-მ ნივთბის დამზადება 2016 წელს დაიწყო. თავდაპირველად, ეს იყო მეგობრების მიერ სამოყვარულო დონეზე დაწყებული საქმიანობა. სამმა მეგობარმა, რევაზ მახარაძემ, ირაკლი ხელაძემ და ბექა ჯიჯიაშვილმა ბიზნეს საქმიანობა სანათების შექმნით დაიწყეს. ამზადებდნენ ჭაღებს, მაგიდისა და კედლის სანათებს. კომპანიის შექმნისა და სამომავლო გეგმების შესახებ, „თბილისი თაიმსს“ კომპანიის ერთ-ერთი დამფუძნებელი რევაზ მახარაძე ესაუბრა.
„საქმიანობა 2016 წელს დავიწყეთ. თუმცა, თავიდან ყველაფერს სამოყვარულო დონეზე ვამზადებდით. წარმოდგენაც კი არ გვქონდა თითოეულ ჩვენგანს, რომ ჩვენ მიერ დამზადებული ნივთები ასეთი მოთხოვნადი გახდებოდა. რაც შეეხება უშუალოდ ფართო წარმოების დაწყებას, 2017 წელს დავრეგისტრირდით როგორც „JK STUDIO” და ამის შემდეგ აქტიურად დავიწყეთ უკვე ნივთების დამზადება.“
კედლისა და მაგიდის სანათების გარდა, კომპანია აწარმოებს ავეჯსაც.
„2017 წელს გადავწყვიტეთ, გაგვეფართოვებინა საქმიანობა და მოგვეცვა ავეჯის ბაზარიც. ამჟამად სანათებთან ერთად ვაკეთებთ მაგიდებს, სკამებს, თაროების, სახლის დეკორაციებს. ასევე გვაქვს საბავშვო ავეჯის ხაზიც. ამ ყველაფრის გარდა, ვიღებთ ინდივიდუალურ შეკვეთებს მათთვის სასურველი დიზაინის მიხედვით.“
კომპანია გამორჩეულ და განსხვავებულ ნივთებს ქმნის. როგორც მისი ერთ-ერთი დამფუძნებელი განმარტავს მათი მთავარი ნიშა მაღალი ხარისხი და ინდივიდუალური დიზაინია. ეს ის ფაქტორებია, რაც მათ კომპანიას სხვებისგან გამოარჩევს.
„ბოლო წლების განმავლობაში განსაკუთრებით გაიზარდა მოთხოვნა ხის ავეჯზე. ძალიან ბევრი ადამიანი გვიკავშირდება და გვთხოვენ დავამზადოთ ავეჯი ნატურალური მასალისგან. ჩვენი მთავარი მიმართულება მაღალი ხარისხის შენარჩუნებაა, ამიტომ დღესაც მაქისმალურად ვცდილობთ შევინარჩუნოთ ხარისხი, აქედან გამომდინარე, ვფიქრობ, დღეს საკმაოდ კონკურენტულები ვართ ქართულ ბაზარზე.“
როგორც კომპანიის დამფუძნებელი განმარტავს, „JK Studio“-ს ფასები საკმაოდ ხელმისაწვდომია, თუ გავითვალისწინებთ ხარისხს და იმ შრომას, რაც თითოეული ნივთის შექმნაშია ჩადებული.
„ყველაფერს განსაკუთრებული დამუშავება სჭირდება. თითოეული დეტალი გასათვალისწინებელია, რაიმე ცუდად რომ არ გამოვიდეს. გარდა ამისა, ჩვენ მაღალი ხარისხის ბუნებრივ მასალას ვიყენებთ. მომხმარებლის მოთხოვნიდან გამომდინარე, გამოიყენება ფიჭვის, ნაძვის, მუხის, კაკალის ხეები და რა თქმა უნდა, მეტალი. თავად მომხმარებელზეა დამოკიდებული რა მასალის ავეჯის დამზადება სურს. ჩვენ მაქსიმალურად ვცდილობთ გავითვალისწინოთ მათი ინტერესები.“
კომპანია ნივთებს სოციალური ქსელის მეშვეობით ყიდის. სამომავლოდ კი „შოუ რუმის“ გახსნას გეგმავენ.
„სამომავლოდ ძალიან გვინდა გავხსნათ „შოუ რომი“. ძალიან ბევრი ადამიანი ითხოვს მოვიდეს და დაათვალიეროს ჩვენი პროდუქცია. სამწუხაროდ, დღეს ჩვენი საწარმო ფართი არ იძლევა ამის საშუალებას. ამიტომ გვინდა გავაკეთოთ „შოუ რუმი“-ადგილი, სადაც თვმოყრილი იქნება კომპანიის მიერ დამზადებული პროდუქცია და სადაც ნებისმეირ მსურველს საშუალება ექნება მოვიდეს და დაათვალიეროს ნივთები.“
მარიამ ლეკიაშვილი
