გუშინ, პრეზიდენტმა ტრამპმა ჟურნალისტებს განუცხადა, რომ პრესას არ უნდა ჰქონდეს უფლება წეროს ის, რაც მოესურვება.
რეპორტიორის კითხვაზე, თუ რატომ ზღუდავს პრეზიდენტი სიტყვის თავისუფლებას, ტრამპმა უპასუხა, რომ ის ყურადღებას არა მათი უფლებების შეზღუდვაზე, არამედ მათ მიერ სიცრუის ტირაჟირებაზე ამახვილებს.
ტრამპმა 11 ოქტომბერს საკუთარ ტვიტერზე დაწერა, რომ მედიაკომპანიები, რომლებიც მას აკრიტიკებენ უნდა დაისაჯნონ ლიცენზიის ჩამორთმევით. ის ეხმაურება ტელეკომპანია „ენბისისა“ საინფორმაციო გამოშვებებს, სადაც მისი აზრით, მუდმივად სიცრუეს აჟღერებენ. თუმცა, ტელეკომპანია „ენბისის“ შემთხვევაშიც პრეზიდენტს და სახელმწიფოს არ აქვთ უფლება შეუზღუდონ კერძო ტელეკომპანიას მაუწყებლობის უფლება.
გაერო-ს ადამიანის უფლებათა უმაღლესი კომისრის ზეიდ რად ალ-ჰუსეინის შეფასებით, დონალდ ტრამპის განცხადებები მედიის თავისუფლებას საფრთხეს უქმნის.
„საოცარია იმის ხილვა, რომ აშშ–ში, სადაც პრესის თავისუფლება კონსტიტუციის ერთ–ერთი საფუძველია და ამ თავისუფლებას წლების განმავლობაში განსაკუთრებით იცავდნენ, ახლა ჟურნალისტებს თავს პრეზიდენტი ესხმის“, – განაცხადა გაეროს მაღალჩინოსანმა.
საერთაშორისო ორგანიზაციების მტკიცებით, დონალდ ტრამპის პრეზიდენტად არჩევით ახალი, ცრუ ინფორმაციის ერა დადგა. ,,რეპორტიორტები საზღვრებს გარეშე” აცხადებს, რომ პრესის თავისუფლება არასდროს ყოფილა ასეთი საფრთხის წინაშე, როგორც ახლა.
ამასთანავე, ცნობილია რომ ტრამპის მუქარა თეთრ სახლში ბრიფინგების გაუქმებასთან დაკავშირებით ისევ ძალაშია. მისი თქმით, შესაძლოა მან მომავალში პრესის წარმომადგელებს მხოლოდ წერილობითი პასუხები გასცეს.
ნათია კეკენაძე