აჭარაში სტიქიის შედეგებზე, დაზარალებულების უსაფრთხოებაზე და მათი ზარალის კომპენსაციაზე აჭარის საგზაო უსაფრთხოების უფროსმა, არჩილ ჩიქოვანმა ტელეკომპანია „იმედზე“, გადაცემა „ქრონიკის“ ეთერში ისაუბრა.
„საცხოვრებელი ადგილიდან სულ ცამეტი ოჯახი არის გაყვანილი. ყველაზე მეტი 10 ოჯახი არის გაყვანილი ქედაში. დაფიქსირდა 50-მდე მეწყერული ზონა, მათი ნაწილი საგზაო ინფრასტრუქტურას შეეხო, ნაწილი კი კერძო საკარმიდამო ნაკვეთებსა და საცხოვრებლებს უქმნის საფრთხეს. ამინდის გაუმჯობესებისთანავე მოხდება სიტუაციის ვიზუალურ-გეოლოგური შეფასება, სპეციალისტები დადებენ დასკვნებს და ამის შემდეგ შესაბამისი რეგიონის მთავრობა მიიღებს გადაწყვეტილებას.
რეგიონის და მუნიციპალიტეტის მთავრობა ყოველთვის ჩართულია სტიქიით დაზარალებული ოჯახების ზარალის კომპენსირებაში, თუმცა ეს ზარალის ზუსტი ოდენობის განსაზღვრის შემდეგ მოხდება. დაახლოებით 25 ტიპის გზის მონაკვეთზე გვქონდა შეფერხებები, ამ ეტაპზე აღდგენილია საავტომობლო მიმოსვლა. ქობულეთსა და ქედაში გზის ნაწილების და ხიდების დაზიანების ფაქტებია, რაც ასევე იქნება შესწავლილი.
უსაფრთხოების ზომები ყველგან დაცულია, განთავსებულია შესაბამისი საგზაო ნიშნები. მეწყრის პრევენციის ღონისძიებები ყოველ წელს ტარდება, ვაგებთ ხელოვნურ გაბიონებს მეწყრის საწინააღმდეგოდ. ვიცით, რომ მეწყერი არაპროგნოზირებადი სტიქიაა, მაგრამ წელს დაახლებით 27 ფერდსამაგრი სამუშაოა ჩატარებული“, – განაცხადა არჩილ ჩიქოვანმა.
მანანა ღოღობერიძე
