„თუ „ქართულმა ოცნებამ“ კიდევ გაიმარჯვა თბილისში, ძალიან დიდხანს არჩევნები იქნება ბუტაფორია, დამთავრდება არჩევნების გზით ხელისუფლების ცვლილება. ბოლო შანსი გვაქვს,რომ ხელისუფლება შევცვალოთ“ , – განაცხადა ალეკო ელისაშვილმა „ტვ პირველის“ ეთერში.
„ძალიან მძიმე წინასაარჩევნო პერიოდი იყო, ერთადერთი ძალადობა არ ყოფილა, თუმცა ბოლოს ესეც მოხდა მარნეულში. ჩემს წინააღმდეგ ერთადერთი ძალადობა არ ყოფილა, თორემ ყველაფერი გამოიყენეს რაც შეიძლებოდა. სოციალური ქსელი გამოიყენეს ჩემ წინააღმდეგ, ბინძური მიზნებით. ათი ათასობით დოლარი დახარჯეს დეზინფორმაციის გავრცელებისთვის. ათასი სისაძაგლე დამაბრალეს, მაგალითად ის, რომ ჩემს გუნდში ალანა გაგლოევა იქნება.
არსებობს გვერდი და ჰქვია „ალექსანდრე ელისაშვილის მხარდამჭერები“, რაც სისხლის სამართლის დანაშაულია, პროპაგანდის თვალსაზრისით. ამ გვერდზე იდებოდა დასპონსორებული დეზინფორმაცია. გვაქვს შენახული „სქრინები“ და მივმართეთ აუდიტის სამსახურს გამოსაძიებლად.
ჩემი ამომრჩეველი არის ის, ვისაც მობეზრდა „სისხლიანი 9 წელის“ და ასევე 5-წლიანი კორუფციის ყურება. ყველა კვლევა ადასტურებს,რომ მმართველი გუნდის კანდიდატს არ აქვს 30 %-ზე მეტის მხარდაჭერა, ამიტომ დანარჩენი 60% ნაწილდება ოპოზიციურ კანდიდატებზე. შესაბამისად, მნიშვნელოვანია ყველა მოვიდეს არჩევნებზე“ , – განაცხადა ალეკო ელისაშვილმა.
მანანა ღოღობერიძე