„თითქმის ყველა საკრებულოში გვყავს წარმომადგენელი, თუმცა ვიმსჯელეთ ამ ძალადობრივი არჩევნების შემდეგ როგორ უნდა მოვიქცეთ და მივიღოთ თუ არა მონაწილეობა მეორე ტურებში, ქუთაისში, მარტვილში“ , – ამის შესახებ „ნაციონალური მოძრაობის“ წევრმა რომან გოცირიძემ „ტვ პირველის“ ეთერში ისაუბრა.
„ზღაპარი და ლეგენდაა,თითქოს ვიღაცას პარლამენტში შესვლა არ უნდოდა. რაც შეეხება მეორე ტურის ბოიკოტირების საკითხს 2016 წელს, ეს განიხილებოდა მხოლოდ პირველ ერთ საათში, შემდეგ გადაწყვეტილება მიიღო პოლიტსაბჭომ და უმრავლესობამ.
ხელისუფლებამ ადამიანებზე ძალადობის ფორმები დახვეწა, თუ პირველ არჩევნებში ვხედავდით თავ-პირის მტვრევას, ახლა სხვა მეთოდებს იყენებენ. საჯარო სამსახურებში ჩვეულებრივად ატერორებენ დასაქმებულებს. ისინი დააბეჩავეს, ღირსება შეულახეს, აქციეს ხმოსნებად. სკოლებში, ბაღებში, რკინიგზაში, საჯარო სამართლის სექტორში, ყველგან იყო ტოტალური კონტროლი. დახვეწილობის ერთ-ერთი ნიშანია,რომ გარეგნულად კარგად შენიღბეს ეს ძალადობა.
კასპში ვიყავი 26 უბანში,სადაც ყველგან ერთი და იგივე სცენარი იყო. მასწავლებლები იდგნენ და აკვირდებოდნენ საწყალი თვალებით, თუ როგორ მივიდოდა მისი მოსწავლის მშობელი და მისცემდა ხმას. კოორდინატორის ინსტიტუტთან ამას არაფერი კავშირი არ აქვს. ნორმალურ ვითარებაში პარტიას 300 კოორდინატორი არ უნდა ჰყავდეს, ესენი არიან მოსყიდული ადამიანები. თითოეული ადამიანი იყო აღრიცხული და სხვადასხვა ფორმით იყო მოსყიდვა. ოპოზიციის არც ერთ პარტიას არც ერთმა ფირმამ თანხა არ გადაურიცხა. ისინიც დატერორებულები არიან და ურჩევნიათ შავი ფული ხელისუფლებას გადაურიცხონ“ , – განაცხადა რომან გოცირიძემ.
მანანა ღოღობერიძე
