გირჩის მურაბა და მტვერი არაჩვეულებრივი საშუალებაა სუსტი ბრონქების პატრონებისთვის და აძლიერებს იმუნიტეტს. ბორჯომისა და აბასთუმნის მოსახლეობისთვის გირჩის მურაბის დამზადება ოჯახური ბიზნესი და შემოსავლის დამატებითი წყაროა. თუ ეს არაჩვეულებრივი და უნიკალური სამკურნალო თვისებების მქონე პროდუქტი ბორჯომსა და აბასთუმანში უნდა შეგეძინათ, დღეს მისი შეძენა უკვე თბილისშიც არის შესაძლებელი. ერთ-ერთმა მწარმოებელმა, ელიზა გოგოლაძემ ოჯახურ საქმიანობას უფრო ფართო სახე მისცა და „გირჩის მურაბა“ საქართველოს ბაზარზე გაიტანა. „თბილისი თაიმის“ „გირჩის მურაბის“ ერთ-ერთ წარმომადგელენს ინგა ლომიძეს ესაუბრა მურაბის წარმოებისა და სამომავლო გეგმების შესახებ.
ინგა ლომიძის თქმით, „გირჩის მურაბის“ წარმოება ოჯახური ბიზნესია, რომლის წარმოება საკმაოდ დიდი ხნის განმავლობაში ხდებოდა, თუმცა მასშტაბური სახე სულ რამდენიმე თვის წინ მიიღო.
„გირჩის მურაბის წარმოება ჩვენი ოჯახური ბიზნესია და საკმაოდ დიდი ხანია რაც მისი წარმოება ხდება. თუმცა,სულ რამდენიმე თვეა, რაც ჩავერთეთ სტარტააპში და ამ ყველაფერს უფრო ფართო სახე მივეცით. აქამდე თუ მხოლოდ ოჯახიდან ხდებოდა პროდუქციის შეძენა, დღეს ჩვენი მურაბის შეძენა შეგიძლიათ „გუდვილის“ მაღაზიათა ქსელში 22.15 ლარად. „
როგორც ცნობილია, ბევრ სამკურნალო თვისებას შორის, დიდი რაოდენობით ეთერზეთებისა და ფისის შემცველობის წყალობით, ფიჭვის ახალამონაყარი გირჩები მადის დასაქვეითებელ საშუალებადაც გამოიყენება. ის საკმარისად ძლიერ არომატულ საშუალებებს შეიცავს, რომლებიც აწესრიგებს მადას და შიმშილის გრძნობას. ამგვარად, ადამიანი გაცილებით ნაკლებ საკვებს იღებს, ვიდრე ჩვეულებრივ. ეს მეთოდი შეუდარებლად ეფექტურია სხვადასხვა სახის დიეტების ფონზე.
„გაზაფხულზე ფიჭვ
ის მოზრდილი გირჩებისგან ხდება მურაბის დამზადება, რომელსაც გრიპისა და გაციების საწინააღმდეგო გასაოცარი სამკურნალო თვისებებიც აქვს. გირჩის მურაბა ისევე მზადდება, როგორც სხვა ხილისა. ჩაიში ერთი ჩაის კოვზი გირჩის მურაბის ჩამატებით საკუთარ იმუნიტეტს საიმედოდ დაიცავთ“.
როგორც ინგა ლომიძე განმარტავს, ამ ეტაპზე მურაბის დამზადება ოჯახში ხდება და მათი ბრენდი ბაზარზე „გირჩის მურაბის“ სახელწოდებითაა წარმოდგენილი. უახლოეს მომავალში გეგმავენ წარმოების გაფართოებას.
„არის შემოთავაზებები სხვადასხვა კომპანიისგან და უახლოეს მომავალში ჩვენი პროდუქცია სხვა ქსელურ მარკეტებშიც გაიყიდება. ვგეგმავთ, ასევე სხვადასხვა სახის მურაბის დამატებას, რომლებიც უკვე უშულაოდ კონკრეტული ბრენდის ქვეშ იქნება წარმოდგენილი. ამ ეტაპზე ვმუშაობთ იმაზეც, რომ ჩვენი პროდუქცია გავიდეს უცხოეთის ბაზარზე.“
მარიამ ლეკიაშვილი
