ბათუმისა და ლაზეთის ეპარქიის მიტროპოლიტი, მეუფე დიმიტრი, რომელმაც ე.წ. მატროსოვის ციხეში „ციანიდის საქმეზე“ ბრალდებული დეკანოზი გიორგი მამალაძე მოინახულა, აცხადებს, რომ ის მძიმე მდგომარეობაშია. მისი აზრით, დეკანოზს ყველაფერი მოუწყვეს.
„მძიმე მდგომარეობაშია. ის თავის აზრზეა, რომ მის წინააღმდეგ შეთქმულება მოხდა. მიმაჩნია, რომ შეთქმულება ეკლესიის და მის წინააღმდეგ იყო. ვისაუბრე დიდხანს. კითხვა დავსვი, რომ ეჭვი არ მეპარება, ეს ეკლესიის და პატრიარქის წინააღმდეგ იყო.
ჰქონდა თუ არ ჰქონდა მას ციანიდი, ძველ აზრზე ვარ, იმ მხრივ, რომ მაშფოთებს ჩანაწერი, სადაც საუბარია ტკბილზე, განეიტრალებაზე. მრჩება აზრი, რომ მოუწყვეს“, – განაცხადა მეუფე დიმიტრიმ.
მეუფე დიმიტრი შიოლაშვილმა საპყრობილეში მამა გიორგი მამალაძე პირველად მოინახულა.
დეკანოზი გიორგი მამალაძე მეუფე დიმიტრის ნახვას რამდენიმე თვის წინ ითხოვდა, მაშინ როდესაც ცხრათვიანი პატიმრობა ჰქონდა შეფარდებული. მიტროპოლიტი დიმიტრი შიოლაშვილი მისი სულიერი მოძღვარია.