საქართველოს 10 რეგიონში კვლევა ჩატარდა და მასში 1106-მა ქალმა მიიღო მონაწილეობა. შერჩევაში მონაწილე ქალების საშუალო ასაკი -40 წელია. კვლევის ინსტრუმენტად სტრუქტურირებული კითხვარი, ღია და დახურული კითხვებით არის გამოყენებული. პრიორიტეტული საკითხები რესპონდენტებმა წინასწარ მომზადებული სიიდან აარჩიეს, მათ „სხვა“ საკითხების დამატების შესაძლებლობაც ჰქონდათ.
კვლევის მიხედვით, პრობლემური საკითხების პირველი ხუთეული ასე გამოიყურება:
- გზებისა და ტროტუარების მოწესრიგება;
- სასმელი წყლის ხელმისაწვდომობა;
- პარკები, სკვერები და სხვა საჯარო ადგილები, გამწვანება, გარე განათება;
- ბაღებისა და სკოლამდელი აღზრდის დაწესებულებების ხელმისაწვდომობა და გაუმჯობესება
- ნარჩენების მართვა;
კვლევის ავტორების თქმით, პრობლემური საკითხების სიაში უპატრონო ცხოველების პრობლემის მართვა, უსახლკაროები და სოციალურად დაუცველები, ოჯახში და ქალთა მიმართ ძალადობაც მოხვდა.
როგორც თავად ქალი რესპონდენტები აღნიშნავდნენ, მოუწესრიგებელი გზის საფარი, ტროტუარების სიმცირე და სივიწროვე, მათთვის განსაკუთრებით პრობლემურია. ასევე, ზამთარში მოყინვის საწინააღმდეგო ღონისძიებების (დროულად) გაუტარებლობა, რის გამოც ტროტუარებზე უსაფრთხოდ გადაადგილება რთულია, განსაკუთრებით საბავშვო ეტლით და/ან ჩვილი ბავშვით ხელში.
სასმელი წყლის ხელმისაწვდომობის საკითხი ქალების ტრადიციულ როლთან – „სახლის საქმეებთან“ არის კავშირში, რაც რიგ შემთხვევებში გაუმართავ საგზაო ინფრასტრუქტურასთან ერთად, ქალების მდგომარეობას ორმაგად ამძიმებს. განსაკუთრებით კი სოფლად, სადაც საქონლის მოვლასთან დაკავშირებულ სანიტარიის საკითხებზე პასუხისმგებლობა ქალებს ეკისრებათ.
ხოლო, პარკებისა და სკვერების პრობლემა ეკოლოგიასთან, ბავშვების ჯანმრთელობასთან, მათი გართობისა და ქალებისთვის საჯარო სივრცეში ურთიერთობის საჭირო სივრცეების გაუმართაობა-ნაკლებობასთან არის კავშირში.
,,ბაღებისა და სკოლამდელი აღზრდის დაწესებულებების სიმწირე ან/და გაუმართავი მუშაობა, ბუნებრივია, ბავშვების კეთილდღეობასთან არის კავშირში, თუმცა ამავდროულად ეს გავლენას ახდენს დედების საქმიანობაზეც, როგორც სახლში („სახლის საქმეებთან“ მიმართებით), ისე სამსახურში. იმის გამო, რომ ბაღების მუშაობის გრაფიკი არ ემთხვევა დედების სამუშაო გრაფიკს (მათ შორის, საჯარო სამსახურში), მათ ხშირად უწევთ სამსახურში დაგვიანება ან/და სამსახურიდან ადრე გამოსვლა“, – ნათქვამია კვლევაში.
რაც შეეხება ქალთა მიმართ ძალადობას, კვლევაში აღნიშნულია-იმის მიუხედავად, რომ ეს საკითხი მხოლოდ ადგილობრივი თვითმმართველობის კომპეტენციას სცდება, ქალებმა მიიჩნიეს, რომ ადგილობრივმა თვითმმართველობებმა ოჯახში ძალადობის მსხვერპლი ქალების დახმარებაზე, მათ შორის, თავშესაფრებისა და სარეაბილიტაციო ცენტრების მოწყობაზე და სხვა მექანიზმებისა და სერვისების შექმნაზე, მეტად უნდა იზრუნონ.
ნინო ზარიძე