„დიდი ხანია ვსაუბრობთ,რომ სასამართლოში ჩამოყალიბდა კლანური მმართველობის სისტემა და ვსაუბრობთ იმ მოსამართლე წევრებზე,რომლებიც ცდილობენ ყველა გადაწყვეტილება მიიღონ ისე,რომ მათი მმართველობა გამყარდეს“ , – სასამართლო ხელისუფლების და იუსტიციის უმაღლესი საბჭოს პრობლემებზე ორგანიზაცია „საერთაშორისო გამჭვირვალობა-საქართველოს“ დირექტორმა ეკა გიგაურმა „ტვ პირველზე“, გადაცემაში „დიანა ტრაპაიძის დღის ამბები“ ისაუბრა.
„ცდილობენ სასამართლო სისტემაში მოიყვანონ კადრები,რომლებსაც პრობლემური წარსული აქვთ. ამის მიუხედავად მათ მოსამართლეების კონკურსში უპირატესობა ენიჭებათ და ზოგი მათგანი უვადოთაც ინიშნება. ეს კრიზისი შესაძლოა კიდევ უფრო გაღრმავდეს.მმართველმა პარტიამ ყურადღება უნდა მიაქციოს ამ სისტემას და კონკრეტული ნაბიჯები გადადგას იმისთვის,რომ რეფორმების შემდეგ კონკრეტული შედეგი დადგეს, კანონმდებლობა უნდა დაიხვეწოს. კანონში ისედაც წერია,რომ შესაბამისი გამოცდილების და თვისებების ადამიანი უნდა დაინიშნოს მოსამართლედ, მაგრამ ეს რეალურად არ სრულდება.
არავის ამ ქვეყანაში არ აწყობს,რომ გვქონდეს ცუდი სასამართლო სისტემა, ის შემდეგ შეეხება ყველა სფეროს, გავლენას მოახდენს საინვესტიციო გარემოზე. ამიტომ ვაკრიტიკებთ ამ სისტემას და გვინდა ძირეული ცვლილებები. ძალიან ცოტაა ისეთი ადამიანები,რომლებიც პრინციპების მიხედვით მოქმედებენ. ნინო გვენეტაძეს შეეძლო უფრო მყარად დამდგარიყო თავის პოზიციაზე,როდესაც საქმე ეხებოდა საეჭვო რეპუტაციის მოსამართლეების დანიშვნას. მისი მხრიდან არ მოხერხდა,რომ პრინციპული ყოფილიყო“ , – განაცხადა ეკა გიგაურმა.
მანანა ღოღობერიძე