საქართველოს შინაგან საქმეთა სამინისტრომ უკანონო ცეცხლსასროლი იარაღი და საბრძოლო მასალა ამოიღო.
უწყების ინფორმაციით, შსს-ს ქობულეთის რაიონული სამმართველოს თანამშრომლებმა ჩატარებული ოპერატიულ-საგამოძიებო ღონისძიებების შედეგად ცეცხლსასროლი იარაღის და საბრძოლო მასალის უკანონო შეძენა-შენახვის ბრალდებით 1957 წელს დაბადებული სულიკო ლ. ქობულეთში დააკავეს.
სამართალდამცველებმა ქობულეთის რაიონის სოფელ ალამბარში დაკავებულის საცხოვრებელი სახლის ჩხრეკისას “მაკაროვის”” სისტემის მაყუჩიანი პისტოლეტი, 3 ხელნაკეთი პისტოლეტი, “ა-კა-ემ”-ის მოდელის ავტომატის 4 მჭიდი, “ერ-გე-დე”-ს ტიპის 1 ხელყუმბარა, “ეფ 1”-ის ტიპის 1 ხელყუმბარა, დენთის 234 ცალი ფეთქებადი ჩხირი და სხვადასხვა ცეცხლსასროლი იარაღის 199 საბრძოლო ვაზნა ამოიღეს.
როგორც სამინისტროს განცხადებაშია ნათქვამი, დაკავებული ჩადენილ დანაშაულს აღიარებს.
გამოძიება ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის ფაქტზე (სსსკ-ის 236-ე მუხლის 1-ლი ნაწილით) მიმდინარეობს.
20.09.13
