„საერთაშორისო ფასების ზრდა აგვისტოს ბოლოს დაფიქსირდა და მას შემდეგ გრძელდება, ამან ადგილობრივ ბაზარზე ფასების კორექტირება გამოიწვია“ , – საწვავის გაზრდილი ფასის შესახებ ნავთობიმპორტიორთა კავშირის ხელმძღვანელმა ვანო მთვრალიშვილმა „ტვ პირველზე“, გადაცემაში „საქმის კურსი“ ისაუბრა.
„მხოლოდ ოქტომბრის თვეში საწვავის საშუალო ფასი გაზრდილია 10-15 თეთრით. მიმდინარე დღეებშიც გაიზარდა 3-5 თეთრით. ბოლო ორი დღეა მნიშვნელოვანი კლება მოხდა საერთაშორისო ბაზრებზე და ერთჯერადად შემცირების ტენდენციაა. მეორე ნეგატიური ფაქტორი საწვავის ფასის ფორმირებისთვის არის ლარის გაცვლითი კურსი დოლართან. ის ბოლო პერიოდში მნიშვნელოვნად არის გაუფასურებული, რაც დამატებითი წნეხია.
ნავთობპროდუქტი სწრაფად გაყიდვადია, დროის მოკლე ინტერვალში იყიდება, შესაბამისად კომპანიები მას ყიდულობენ დოლარში, ყიდიან ლარში და მიღებული შემოსავლით იძენენ თავიდან დოლარს, რაც არაპროგნოზირებად ვითარებაში აგდებს ბიზნესს. მომხმარებელი მხოლოდ ტაბლოზე არსებულ ფასს ხედავს, მაგრამ აქ მნიშვნელოვანია ბიზნესის დიდი ზარალი. მიმდინარე ფასები არის იმ მოტივით შენარჩუნებული, რომ არ დაკარგონ მომხმარებელი“ , – განაცხადა ვანო მთვრალაშვილმა.
მანანა ღოღობერიძე
