ქართულ ბაზარზე ხელნაკეთი მინის სამკაულები გამოჩნდა

,,Glass Art Studio“ მაღაზიაა საქართველოში, სადაც მომხმარებლებს შეუძლიათ შეიძინონ ოსტატების მიერ მურანოს შუშისგან შექმნილი ხელნაკეთი, უნიკალური დიზაინის მქონე სამკაულები, დაესწრონ ნაკეთობების შექმნის პროცესს და შეისწავლონ თუ როგორ გარდაიქმნება შუშა (მინა) სამკაულებად. კომპანიის მომსახურეობასა და სამომავლო გეგმებზე ,,თბილისი თაიმსს“ უფრო დეტალურად ,,Glass Art Studio”-ს წარმომადგენელი ესაუბრა.

რამდენი ხანია, რაც თქვენი კომპანია არსებობს და რით გამოირჩევა ,,Glass Art Studio“–ს სხვა ამ ტიპის მაღაზიისგან?

-,,Glass Art Studio” შექმნილია 2016 წლის ოქტომბერში, ჩვენ სხვებთან შედარებით არა მხოლოდ მაღაზია, არამედ სახელოსნოც გვაქვს, იმის გარდა, რომ თქვენ შეგიძლიათ შეიძინოთ უნიკალური ხელნაკეთი სამკაული, თქვენ გეძლევათ საშუალება დაესწროთ შექმნის პროცესს. ჩვენს სტუდიაში, თქვენ შეძლებთ ნახოთ, თუ როგორ გარდაისახება შუშა, დნება, იბერება, სხვადასხვა ტექნოლოგიების გამოყენებით და გარდაიქცევა სამკაულებად (ჩვენ, როგორც ჩვეულებრივ მძივებს, აგრეთვე ცხოველების ფორმებსა და ნიჟარების ფიგურებს ვქმნით).

გვესაუბრეთ ,,Glass Art Studio“–ს მომსახურეობაზე და რამდენად ხელმისაწვდომი ფასები გაქვთ, რა ფასებშია შესაძლებელი მურანოს შუშისგან შექმნილი ხელნაკეთი უნიკალური სამკაულების შეძენა?

– ჩვენი სამკაულები, არ არის ყველასთვის ხელმისაწვდომი, რადგან თვითონ მასალა (მინა) ძვირად ფასობს, ასევე არსებობს შუშები, რომლის შემადგენლობაში არის ვერცხლი და ოქრო, რაც ნაკეთობას მეტ ბზინვარებას მატებს, ასევე ჩვენ ვიყენებთ ვერცხლის ფურნიტურას (ანუ რაზეც ვამაგრებთ ჩვენს სამკაულებს, საყურეებს, ბეჭდებს, ჯაჭვებს) ანუ ჩვენ ვქმნით დიზაინს და შემდგომ, ოსტატი აცოცხლებს ჩვენ მიერ შექმნილ ესკიზს მასალაში.

ამ ეტაპზე ჩვენი აქტიური მომხმარებლები ტურისტები არიან, უმეტესწილად ისინი, ვინც ფლობენ ინფორმაციას ვენეციური შუშის შესახებ, ვინც ნამყოფია ვენეციაში, მურანოს კუნძულზე, ადარებენ ფასებს და ყიდულობენ ჩვენგან. სამწუხაროა ის ფაქტი, რომ ახლა ჩინეთიც ამზადებს ე.წ. „მურანოს“ სამკაულებს და წარმოაჩენს, როგორც ხელნაკეთს (რა თქმა უნდა, შედარებით იაფია).

სად შეიძლება თქვენი პროდუქციის შეძენა?

– ჩვენი სამკაულების შეძენა შესაძლებელია ჩვენს სტუდიაში, რომელიც მდებარეობს ღვინის აღმართის 5 (მეტრო ავლაბართან ახლოს, ასევე ევროპის მოედანთან), აგრეთვე შესაძლებელია ჩვენი ონლაინ მაღაზიის მეშვეობით www.glassartstudio.online

რამდენად კონკურენტუნარიანი ხართ ქართულ ბაზარზე და რა სახის პროდუქციას სთავაზობთ მომხმარებლებს?

– ჩვენი ბიზნესის კონკურენტუნარიანობაზე საუბარი ცოტა რთულია. საქართველო ცნობილია ხელნაკეთი ნივთების მრავალფეროვნებით, მაგრამ შუშა (მინა) ჯერ არ არის გავრცელებული. რამდენიმე ოსტატი მუშაობს მინაზე, ისინი იყენებენ სხვა ტექნოლოგიას (ფიუზინგს), რამდენადაც ჩვენთვის ცნობილია, მსურველები არიან, რომ გახსნან მსგავსი ტიპის მაღაზია. მათ გადაწყვიტეს მასალა შექმნან არა საქართველოში, არამედ ჩამოიტანონ იტალიიდან. ასე რომ ამ ეტაპზე კონკურენციას ვერ ვგრძნობთ, თუმცა დროთა განმავლობაში შეიძლება ბევრი რამე შეიცვალოს.

გვესაუბრეთ ყველაზე მოთხოვნადი სამკაულის შესახებ…

– ძალიან რთულია გამოყო რომელიმე კონკრეტული ნაკეთობა, რომელიც უფრო მოთხოვნადია. ჩვენ ვიცით, რომ ყველა სამკაულს თავისი მყიდველი ჰყავს.

რამდენად არის საზოგადოების მხრიდან დაინტერესება მსგავსი სტილის ხელნაკეთ სამკაულებთან დაკავშირებით?

– ამ ბოლო დროს გვახარებს ის, რომ ქართველი მომხმარებლისგანაც ვგრძნობთ აქტიურობას. თავიდან მოდიან, ათვალიერებენ, შემდგომ აუცილებლად ბრუნდებიან, რომ საჩუქარი გაუკეთონ თავიანთ საყვარელ ადამიანებს.

გვესაუბრეთ ,,Glass Art Studio“-ს სამომავლო გეგმებზე?

– გეგმები დიდი და მრავალფეროვანი გვაქვს. ამ ეტაპზე ველოდებით საერთაშორისო კონფერენციას (რომელიც გაიმართება მაისში, ვენეციაში). ასევე ვფიქრობთ, მიმართულების განვითარებაზე, მაგალითად, ახლა გვსურს სახლის აქსესუარების დამატება და ჭიქების შექმნა. ჩვენ გავხდით hippo.ge-ს პარტნიორები, ასე რომ შესაძლებელია უპროცენტო განვადებაც.

ეკა წიკლაური