ქართველი რეჟისორის გიორგი ოვაშვილის ახალი ნამუშევარი „ხიბულა“ დღეიდან საქართველოს კინოთეატრებში გამოდის. ფილმის დახურული ჩვენება 21 ნოემბერს გაიმართა. სპეციალურად ამ მოვლენისთვის საქართველოში ზვიად გამსახურდიას როლის შემსრულებელი ირანელი მსახიობი ჰოსეინ მაჰჯუბი ჩამოვიდა.
„ხიბულა“ საქართველოს კულტურისა და ძეგლთა დაცვის სამინისტროსა და ეროვნული კინოცენტრის მხარდაჭერით შეიქმნა. იგი საქართველოს, გერმანიისა და საფრანგეთის კოპროდუქციაა. ფილმის სცენარს საფუძვლად უდევს 1991 წელს, საქართველოს დამოუკიდებლობის აღდგენის შემდეგ, ქვეყანაში განვითარებული რეალური მოვლენები. სიუჟეტი საქართველოს პირველი პრეზიდენტის ზვიად გამსახურდიას ცხოვრების უკანასკნელ დღეებს მიჰყვება.
„ხიბულას“ მსოფლიო პრემიერა კარლოვი ვარის საერთაშორისო კინოფესტივალის მთავარ საკონკურსო პროგრამაში შედგა, ეროვნული პრემიერა კი ბათუმის საავტორო კინოს საერთაშორისო ფესტივალის ფარგლებში გაიმართა.
„ხიბულას“ გადაღება მილიონნახევარი ევრო დაჯდა. ფილმი საქართველოს, გერმანიისა და საფრანგეთის ერთობლივი პროდუქციაა, სადაც თანხის 25% საქართველომ გამოყო, ხოლო დანარჩენი ფული მოპოვებულ იქნა გერმანული და ფრანგული ფონდებიდან.
ფილმის პრემიერის მხარდამჭერები არიან „თიბისი ბანკი“, DHL, „ვისოლი“, Kinotechnics. მედია პარტნიორები არიან: „პალიტრა მედია“ და „რუსთავი 2“.
