„პირველ რიგში ჩვენ ვართ დაინტერესებულები,რომ რაც შეიძლება სწრაფად ჩატარდეს გამოძიება და გვქონდეს სრული სურათი თუ რა მოხდა. ერთხელ გაფრთხილებული, დაჯარიმებულიც იყო ეს კომპანია შსს-ს მიერ. თუმცა, არც ერთი ჯარიმა არ არის ტოლფასი 11 ადამიანის სიცოცხლის“ , – ბათუმის სასტუმრო „ლეოგრანდის“ ხანძრის შესახებ აჭარის მთავრობის თავმჯდომარემ, ზურაბ პატარაძემ „იმედზე“, გადაცემა „ქრონიკის“ ეთერში ისაუბრა.
„კანონის სრული სიმკაცრით იქნება დასჯილი ყველა ის ადამიანი, ვინც იყო პასუხისმგებელი. არ აქვს მნიშვნელობა ის კერძო კომპანიას წარმოადგენდა თუ სახელმწიფო სტრუქტურას. არ გამოვრიცხავ,რომ იყო სახანძრო სისტემები,მაგრამ არ იყო გამართული. მიმდინარეობს გამოძიება და მალე გვექნება საბოლოო სურათი. ეს უნდა იყოს განგაში სხვა ორგანიზაციებისთვის.
ტურიზმის დეპარტამენტს არ აქვს ბერკეტები, მხოლოდ სარეკომენდაციო წერილის გაცემა შეუძლია. ეს უფრო მარკეტინგული ინსტრუმენტია. რაც შეეხება კანონმდებლობას, 2005 წლიდან რეგულაციები იყო ბოლომდე გამარტივებული, ნებისმიერ ინვესტორს შეეძლო დაეწყო მშენებლობა და კანონი არ აძლევდა იმის საშუალებას,რომ ნორმები დაცული ყოფილიყო. უნდა მივყვეთ ფერხულში დღევანდელ გამოწვევებს და დამატებითი ზომები უნდა მივიღოთ, უნდა გამკაცრდეს რეგულაციები“ , – განაცხადა ზურაბ პატარაძემ.
მანანა ღოღობერიძე