„მიხეილ სააკაშვილმა უკვე გაიმარჯვა, როდესაც უკრაინელმა ხალხმა გადმოიყვანა დაპატიმრებული მანქანიდან. მისი დაკავება იყო უგუნური გადაწყვეტილება პოროშენკოს მხრიდან, ის ვა ბანკზე წავიდა“ , – მიხეილ სააკაშვილის მხარდამჭერი აქციის დეტალებზე და თბილისში გამართული „ღირსების მანიფესტაციის“ მნიშვნელობაზე „ნაციონალური მოძრაობის“ წევრმა ზაალ უდუმაშვილმა „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„ოლიგარქიული შეთანხმება იყო,რომლის მიხედვითაც დაგეგმილი იყო სააკაშვილის განეიტრალება უკრაინაში და შემდეგ მისი ექსტრადირება თუნდაც საქართველოში. ეს გეგმა ჩაიშალა და ჩაშალა ისევ უკრაინელმა ხალხმა, რომლებმაც უბრალოდ არ მისცეს საშუალება ძალოვანებს, რომ სააკაშვილი გადაეყვანათ პოლიციის განყოფილებაში. სააკაშვილის სიძლიერეა ის ხალხი,რომელიც მზად არის ბრძოლისთვის.
შეერთებული შტატები და ევროკავშირი თავის განცხადებებში ცალსახად აღნიშნავენ,რომ ეს იყო არასწორი გადაწყვეტილება. აშშ-ის მკაფიო განცხადებაში ნათქვამია, უკრაინა ჩვენი მეგობარია, მაგრამ მას არ ვეთანხმებით ბევრ რამეშიო. რამდენად შეიგნებენ ამას პოროშენკოს ხელისუფლებაში ჩემთვის გაუგებარია. ის ოლიგარქია და მისი ფიქრებიც ემყარება ოლიგარქიულ ინსტინქტებს.
ამ მოვლენების კავშირი ჩვენთან არის პირდაპირი. 2012 წლიდან 2017 წლამდე უკრაინასთან არანაირი ოფიციალური კავშირი არ არსებობდა, მიუხედავად იმისა,რომ უკრაინა ჩვენი მთავარი სტრატეგიული პარტნიორია. კიევთან ურთიერთობა და მისვლა-მოსვლა მაშინ გახდა საჭირო,როცა მიხეილ სააკაშვილი გახდა მთავარი ოპოზიციური ძალა უკრაინაში. ფაქტია,რომ ეს რაღაც ოლიგარქიული შეთანხმებაა. ქვეყანას,რომელსაც ევროკავშირის წევრობაზე აქვს პრეტენზია, არ შეიძლება ჰყავდეს ოლიგარქი პრეზიდენტი“ , – განაცხადა ზაალ უდუმაშვილმა.
მანანა ღოღობერიძე