„მე კატეგორიული მოწინააღმდეგე ვარ ნებისმიერი ნარკოტიკის მოხმარების, ისევე როგორც თამბაქოს და ჭარბი ალკოჰოლის. ყველა ნარკოტიკი არის მავნებელი ადამიანის ჯანმრთელობისთვის, ასევე კატეგორიულად წინააღმდეგი ვარ, რომ დღეს ის ნარკოტიკი,რომელიც ლეგალური არ არის, გახდეს ლეგალური“ , – ამის შესახებ პარლამენტის ჯანდაცვის კომიტეტის თავმჯდომარემ, აკაკი ზოიძემ „ტვ პირველზე“, გადაცემა „რეაქციას“ ეთერში ისაუბრა.
„ჩვენ ფაქტობრივად ლეგალიზებული გვქონდა ნარკოტიკები 90-იან წლებში. როდესაც არ არსებობს პრევენცია, მკურნალობა, ინფორმაციის წყარო შესაძლო არასასურველი შედეგების შესახებ, თავისუფალ არჩევანზე საუბარი არასწორია. ერთადერთი გამოსავალი არის ჰუმანური ნარკოპოლიტიკა. რეგულარული მომხმარებლების წრეში ჩართვა შეგვიძლია თავიდან ავიცილოთ დეკრიმინალიზაციით.
არავინ ფიქრობს მინიმუმ 150 ათას ადამიანზე, რომელიც 50 ათასი რეგულარული ნარკომომხარებლის ოჯახის წევრია და სიტუაციის მსხვერპლი არიან. თუ ახლა გავუშვით შესაძლებლობის ფანჯარა, ამ გადაწყვეტილების მიღება შესაძლოა კიდევ გადაიწიოს წლობით. დღეს მოთმინებით ბოლომდე უნდა მივიტანოთ და გადავტეხოთ ეს პრობლემა. დღევანდელი ნარკოპოლიტიკა მიმართულია არა იმისკენ,რომ შევაკავოთ ადამიანი,რომელიც უფსკრულის პირას დგას, არამედ ვუბიძგებთ მას,რომ უფსკრულში გადაეშვას.
ვცდილობთ ამოვწუროთ დისკუსია და არავის გაუჩნდეს აზრი,რომ რაიმე ფორმით ამ კანონპროექტების მიღებით ხელი შეიძლება შეეწყოს ნარკოტიკების არალეგალურ ბრუნვას, გაყიდვა-გასაღებას. ამ საფრთხეს ხედავს უმრავლესობის ნაწილი, სამართალდამცავი სტრუქტურების ნაწილი. უახლოესი 10 დღის განმავლობაში შევჯერდებით და გავიტანთ სესიაზე პროექტს. ჩემთვის მისაღებია ახალგაზრდული მაქსიმალიზმი და არასდროს უკან დამიხევია მათ მხარდაჭერაზე“ , – განაცხადა აკაკი ზოიძემ.
მანანა ღოღობერიძე
