მართლმადიდებლობას, რომელსაც ჩვენი უმრავლესობა ბევრად უარესად იცნობს, ვიდრე საჭიროა, ბევრად უკეთესად უნდა იცნობდეს, თუკი მისი შენარჩუნება სურს. უპირველესყოვლისა, ვინაიდან, გვინდა თუ არა მკვიდრნი ვართ ამა სოფლისა, რამეთუ ფხიზლად და წრფელად ვუმზერდეთ გარნა არ დავყვეთ სოფელსა და საცდურთა მისთა.
სახელდობრ უნდა განვამზადოთ ჩვენი ახალგაზრდები მოსალოდნელ განსაცდელთათვის. უნდა ჩავუნერგოთ მათ ამქვეყნიურ საცდურთა წინააღდგომის უნარი. ჩვენ უნდა გულისხმავყოთ, რომ სოფელი იშვითად თუ შეგვეწევა, ნიადაგ კი ხელს გვიშლის ყმაწვილის ჭეშმარიტი მართლმადიდებელი სულით აღზრდაში. მუდამ მზადყოფნა გვმართებს, რათა საწუთროს ზემოქმედებას ქრისტიანული აღზრდის კეთილგონიერი პრინციპები დავუპირისპიროთ, საამისოდ კი ყოველივე, რასაც ყმაწვილს სკოლაში ასწავლიან, შინ უნდა შევუმოწმოთ და გავუსწოროთ. ნურვინ იფიქრებს, რომ ყმაწვილის მიერ სკოლაში შეძენილი ცოდნა უბრალოდ სასარგებლო, ან საამსოფლო, მართლმადიდებლური აღზრდისაგან სრულიად განცალკავებული რამ იყოს. სკოლაში შესაძლოა, კიდეც შეასწავლონ გამოსადეგი ხელობა და საგნები, მაგრამ ამ შემთხვევაშიც მრავალ მცდარ თვალსაზრისსა და დამოკიდებულებას უნერგავენ. მოზარდის ძირეული დამოკიდებულებანი და შეფასებანი ლიტერატურის, ისტორიის, მუსიკის, ხელოვნების, ფილოსოფიის, თვით მეცნიერებისა და ცხადია, ცხოვრებისა და რელიგიის მიმართ სკოლიდან კი არ უნდა მოდიოდეს, სადაც თანამედროვე ფილოსოფიით შეზავებულს ასწავლიან ყოველივეს, არამედ უწინარესად ოჯახიდან და ეკლესიიდან. უამისოდ არასწორ განათლებას მიიღებს იგი, რამეთუ დღეს საერთო განათლება უმჯობეს შემთხვევში აგნოსტიკური ხასიათისაა, უარესში ათეისტური, ან ანტირელიგიური.
საბჭოთა კავშირში, რა თქმა უნდა, მოზარდს ძალით ახვევდნენ თავს ამ ყველაფერს, ყოველგვარი რელიგიის გარეშე, ათეისტური აღზრდის აქტიური პროგრამის გამოყენებით. მშობლებმა ზუსტად უნდა იცოდნენ რას ასწავლიან მათს შვილებს სხვადასხვა ზოგადსაგანმანათლებლო კურსებზე, ასევე, რა მუსიკას უსმენენ მათი შვილები, რა ფილმებს უყურებენ (თუ საჭიროება მოითხოვს, მათთან ერთად უსმინონ და უყურონ), რა ყაიდის მეტყველება ესმით, თავად როგორ მეტყველებენ, და ყოველსავე ამას ქრისტიანული შეფასება უპოვონ. მათ, ვისაც ტელევიზორის ფანჯრიდან გადაგდება ვერ გადაუწყვეტიათ, მკაცრი კონტროლი უნდა დააწესონ ამ მანქანის მომწამვლელი ზემოქმედების ასარიდებლად, რამეთუ ტელევიზორი ანტიქრისტიანულ შეხედულებათა და იდეათა მთავარი მასწავლებელი გახდა ოჯახში, მოზარდთათვის განსაკუთრებით. ბავშვთა აღზრდაზე იმიტომ გესაუბრებით, რომ სოფელი, პირველყოვლისა, სწორედ ამ დროს მძლავრობს, მართლმადიდებელ ქრისტიანებზე და თავის კვალობაზე აღზრდის მათ. ერთხელ თუ ჩამოყალიბდა მოზარდის მცდარი დამოკიდებულება, მერმე მისი ქრისტიანული აღზრდა ერთიორად ძნელდება, მაგრამ მარტო მოზარდნი კი არა, ჩვენ, ყველანი, ვდგავართ ამა სოფლისა პირისპირ, რომელიც ცდილობს, ანტიქრისტიანებად გვაქციოს-სკოლის, ტელევიზიიის, კინოს, პოპულარული მუსიკისა და მრავალი სხვის მეშვეობით, უპირატესად დიდ ქალაქებში რომ გვატყდება თავს. ჩვენ გვმართებს, გულისხმავყოთ, რომ ყოველივე ეს ერთი სათავიდან მომდინარეობს, მას აქვს გარკვეული რიტმი და შინაარსი, ჩვეთვის განკუთვნილი. საკუთარი თავის სათნოყოფა, მოდუნება, ყველაფრის არად ჩაგდება, ზესთა სოფელზე ყოველგვარი ფიქრის უარყოფა, ეს ყოველივე სხვადსხვა სახით ერთსა და იმავე შინაარსს შეიცავს, თავს გვახვევს უღმერთოებას. ვინაიდან გვესმის, რას გვიპირებს ეს სოფელი, მაშასადამე თავის დასაცავად ბრძოლაც გვმართებს, თანაც ამ ჩვენი მართლმადიდებლური ქრისტიანული თვალ;საზრისი ჩამოყალიბებისა და ქრისტეს შემეცნების გზით.
გულახდილად რომ ვთქვათ, თუ დავაკვირდებით როგორ ცხოვრობენ და რა სულიერ მემკვიდრეობას გადასცემენ თანამედროვე მართლმადიდებელი ოჯახები, იფიქრებთ, რომ ეს ბრძოლა, უმეტესწილად, წაგებული აქვთ. ნამდვილად, ძლიერ მცირეა იმ მართლმადიდებელ ქრისტიანთა რიცხვი, რომელთაც საკუთარი სახე სრულებით შეუნარჩუნებიათ და თანადროული ქვეყნიერების კვალად არ იცვლებიან. ყმაწვილი, თავიდანვე მიჩვეული კარგ ლიტერატურას, დრამასა და პოეზიას, ვისაც სულით მათი ზემოქმედება უგრძნია, ესე იგი, ჭეშმარიტი ტკბობა უგემია. ადვილად აღარ მოიხიბლება თანამედროვე კინოთი, ტელევიზიითა და მდარე რომანებით, რომელნიც სულს უარყოფენ და ქრისტიანული გზიდან აცდუნებენ. ამიტომ, ამა სოფლის სულთან ბრძოლაში ჯერ არს ვიხმიოთ ის უმჯობესი, რისი შემოთავაზებაც, სოფელს ძალუძს, რათა ამ უმჯობესსაც აღვემატოთ. ქვეყნად ყოველივე უმჯობესი ღმერთსა და მართლმადიდებლობაზე მიანიშნებს და ჩვენ კი ამით სარგებლობა გვმართებს.
მასალა ეკუთვნის
იღუმენ მამა გაბრიელ ჯიქიას
