„ჩვენთვის ცნობილია, რომ მიმდინარეობს გამოძიება, თანამშრომლების გამოკითხვა, ყოველდღიურ რეჟიმში დოკუმენტების გამოთხოვა. შენობა კვლავ დაცულია სამართალდამცავების მიერ და ჩვენც ისევე ველოდებით გამოძიების შედეგებს, როგორც სხვა საზოგადოება“ , – „ლეოგრანდის“ სასტუმროს ტრაგედიის შესახებ მიმდინარე გამოძიების პროცესზე სასტუმროს ადვოკატმა ლაშა წერეთელმა „იბერიაზე“, გადაცემაში „ცენზურის გარეშე“ ისაუბრა.
„ჯარიმა, რომელიც სასტუმრომ 2016 წლის ზაფხულში გადაიხადა მხოლოდ ეხებოდა ცეცხლმაქრების შემოწმებას, ამის შემდეგ საგანგებო სიტუაციების მართვის სამსახურის მოთხოვნა იყო, რომ ევაკუაციის გეგმები უნდა ყოფილიყო ქართულ ენაზე გამოკრული, რაც ასევე შესრულდა. პასუხისმგებლობისგან თავს არავინ ირიდებს, თუმცა ეს ჯარიმა რომ არსებობდა, არაფერს ნიშნავს. გამოსაკვლევია რამდენად იყო წარსულში არსებული დარღვევა კავშირში ამ ტრაგედიასთან.
გამოძიება ინტენსიურად, მიზანმიმართულად მიმდინარეობს. პასუხისმგებლობის საკითხზე ვერ ვისაუბრებ. გარდაცვლილის ოჯახებს კიდევ ერთხელ ვუსამძიმრებ. მათთან შეხვედრა შედგა და შეთავაზებული იყო კონკრეტული გარემოებები, ვვარაუდობთ, რომ ეს პროცესი შეთანხმებით დასრულდება. როდესაც სურათი სრულად იქნება აღდგენილი, მაშინ გადაწყდება გამოძიების დასრულება, ჯერჯერობით ამაზე ლაპარაკი შორს არის“ , – განაცხადა ადვოკატმა ლაშა წერეთელმა.
მანანა ღოღობერიძე
