„ეს არის ჩვენი პროფესია, უნდა შეგეძლოს სიკვდილიც, უნდა აჩვენო როგორ შეგიძლია ცხოვრება როგორც პოლიტიკოსს. თუ შენ არ შეგიძლია სიკვდილი, მაშინ ხალხი სად მიგყავს, მართლა პროვოკატორი ხომ არ ხარ. ძველმოდური კი არის, მაგრამ უნდა აჩვენო როგორ შეგიძლია თავის გაწირვა“ , – ამის შესახებ მიხეილ სააკაშვილმა „რუსთავი 2“-ზე, „შაბათის კურიერის“ ეთერში ისაუბრა.
„დღეს მე მიცავს უკრაინელი ხალხი. სცადონ კიდევ დამაკავონ და მიიღებენ ქუჩაში მილიონს. ხალხი ირყევა საქართველოშიც და მე მომიხდა იმ როლის თამაში,რომ ამ ყველაფრის კატალიზატორი ვიყო. ეს ჩემი მიმდინარე მისიაა. როგორც კი დავინახე ხალხი, მივხვდი რომ ვერ გამიყვანდნენ. ეს ადამიანები მხარს უჭერენ თავის ღირსებას და ხვდებიან,რომ მე ვარ გულწრფელი. მათ მობეზრდათ ხალხის ფეხზე დაკიდება, ზღვარგადასული სიმდიდრე.
დილის 07:00 საათზე მაღვიძებს კარზე ხმაური, ბრახა-ბრუხი. მაშინვე ავიღე ტელეფონი რომ დავით საყვარელიძესთან დამერეკა და ვნახე რომ არ ირეკება, ყველაფერი ჩაახშვეს. რა გზა იყო, გავაღე ფანჯარა, გადავძვერი და დავდექი სახურავზე. ძალიან სისველე იყო, სახურავიც დაქანებულია, მაგრამ გადავძვერი და გავედი სულ ბოლოში იმიტომ, რომ იქედან ჩანდა მაედანი და შემეძლო დამენახა ვინ მოდიოდა და რა ხდებოდა მაედანზე. მოვახერხე ერთადერთი შეტყობინების გაგზავნა დათო საყვარელიძესთან, ისიც ტელეგრამით, სხვა არაფერი მუშაობდა.
შემდეგ უკვე სახურავზე სპეცრაზმიც ამოვიდა. მითხრეს გადმოვსულიყავი, უარი რომ მიიღეს, მითხრეს ჩვენ გადმოვალთო. ვუთხარი არ გირჩევთ, იმიტომ, რომ აქ იქნება შეტაკება და ყველანი გადავცვივდებით-თქო. ვეუბნებოდი, ფეხი არ გაენძრიათ, თორემ შეტაკება მოხდებოდა. 45 წუთის შემდეგ გადმოვიდნენ ჩემთან და ხელბორკილების დადება გადაწყვიტეს. ვუთხარი, რომ ხელბორკილებს არ დავადებინებდი, დაევიწყებინათ ეს. სახურავიდან გადახტომას ნამდვილად არ ვაპირებდი, მაგრამ თუ მოვიდოდნენ და შეტაკება მოხდებოდა, შეიძლებოდა ჩავვარდნილიყავით. პირუტყვივით თავს არ გავასკვანჩინებდი. სახურავზე გავედი იმიტომ, რომ მჭირდებოდა დრო, მე მოვიგე 2 საათი, რათა ხალხი მოსულიყო. იღვიძებენ,ტელევიზორს რთავენ, უნდა მოესწროთ აქ მოსვლა.
მითხრეს,რომ გენერალურ პროკურორს უნდა შენთან დალაპარაკება და ბინაში დაგაბრუნებთო. რა თქმა უნდა მათი არ მჯეროდა, რომ დავინახე ამდენი ხალხი შეგროვდა ვიკითხე საგანგებოდ რა ტელევიზიებია. რომ დამაკავეს შემოვედით ბინაში, ვუთხარი რომ შხაპი უნდა მივიღო. ნელა ჩავიცვი, ამასობაში ხალხი იკრიბებოდა“ , – განაცხადა მიხეილ სააკაშვილმა.
მანანა ღოღობერიძე
