„პრეზიდენტის მიზანი იყო,რომ ლმობიერი დამოკიდებულება ყოფილიყო დამნაშავეების მიმართ, შემსუბუქებოდათ სასჯელი და არ ემხილებინათ უმაღლესი თანამდებობის პირები, რათა სააკაშვილს და მის რეჟიმს რამე პრობლემა არ შექმნოდა. ეს მოხდა შეწყალების გზითაც“ , – მიხეილ სააკაშვილისთვის ბრალის წაყენების შესახებ „ქართული ოცნების“ ერთ-ერთმა ლიდერმა მამუკა მდინარაძემ „იმედზე“, გადაცემა „ქრონიკის“ ეთერში ისაუბრა.
„სისტემური დანაშაული – ეს იყო სტრასბურგის სასამართლოს მოკლე შეფასება და საბოლოო განაჩენის სახით დაადგინა ქართულმა სასამართლომ. ამ საქმემ თავის დროზე შეძრა ჩვენი ქვეყანა. ამის შემდეგ სტრასბურგმა თქვა,რომ გამაოგნებელია ის სისტემური დანაშაული,რომელშიც ჩართულია მთელი პოლიტიკური სპექტრი. ქართული სასამართლოს გადაწყვეტილება იყო სამართლებრივი და ლოგიკური გაგრძელება.
მოვისმინე კომენტარები,რომლებიც მხარს უჭერდა იმ აზრს,რომ მიხეილ სააკაშვილი არ უნდა დასჯილიყო ამ მუხლით, არ აქვს მნიშვნელობა პრეზიდენტი ამბობდა ამას თუ სხვა. ნებისმიერი უფლებამოსილების გამოყენება,თუ ეს დაკავშირებულია დანაშაულის დამალვასთან, ანგარებასთან ან სხვა არამართლზომიერ და უკანონო მოქმედებებთან, ითვლება დანაშაულად. არავინ ამბობს და არც ერთი ნორმალური იურისტი არ იტყვის,რომ უფლებამოსილება არის დანაშაული. თავად პრეზიდენტის უფლებამოსილება არ შეიძლება ჩაითვალოს დანაშაულად“ , – განაცხადა მამუკა მდინარაძემ.
მანანა ღოღობერიძე
