ალბათ, ყველას გვსმენია თხილის სასარგებლო თვისებებზე, რომელის შემადგენლობაში შემავალი ვიტამინები შეიცავს ქოლინს – ამინომჟავას, რომელიც ტვინის მოქმედებას ააქტიურებს. თხილი, გონების ეს აქტიური სტიმულატორი, სხადასხავა დანიშნულებით გამოიყენება. სწორედ ამიტომ, რამდენიმე თვის წინ ნინო ანდრიაძემ და მისი მეუღლემ გადაწყვიტეს, თხილისგან ახალი, სრულიად განსხვავებული პროდუქცია შეექმნათ – „ყოჩაღი ნუში“, „ჭკვიანი თხილი“ და „მოხერხებულ მიწისთხილი“ ის პროდუქტებია, რომელიც დღეს უკვე დიდი მოწონებითა და პოპულარობით სარგებლობს მომხმარებლებში.
„თბილისი თაიმსთან“ საუბრისას კომპანიის ერთ-ერთი დამფუძნებელი ნინო ანდრიაძე განმარტავს, რომ პროდუქცია ნატურალურია და კონსერვატებისგან თავისუფალი.
თქვენ შესახებ რომ მოგვიყვეთ, საიდან გაგიჩნდათ მსგავსი პროდუქციის შექმნის იდეა?
– „ჭკვიანი თხილი“ ოჯახური ბიზნესია. ჩვენი ძირითადი საქმიანობაა საკონსულტაციო კომპანია,რომელიც ინოვაციური და საინტერესო პროდუქტების და სერვისების განვითარებაში ეხმარება. „ჭკვიანი თხილიც“ ერთ-ერთი ასეთი პროდუქტია. გურმანების ოჯახი ვართ. ჩემი 5 წლის შვილიც კი გურმანია. ჯანსაღი ცხოვრება და გემრიელი კვება ძალიან აქტუალური თემაა და ფაქტია რომ ხშირად რთულია ეს ბალანსი დაიცვა.
რამდენი ხანია რაც „ჭკვიანი თხილი“ არსებობს ბაზარზე და რასთანაა დაკავშირებული ბრენდის სახელი?
– როცა ბრენდზე და მის სახელზე ვფიქრობდით, მე და ჩემი მეუღლე ვმსჯელობდით თუ ვისთვის არის ეს პროდუქტი, როგორი ადამიანისთვის და რა სარგებელი უნდა მოუტანოს მას. ამ დროს ჩემმა 5 წლის გოგონამ შეგვახსენა – ხომ გახსოვთ თხილი და ნიგოზი ტვინისთვის არის კარგიო. ასე შეიქმნა „ჭკვიანი თხილი“ , „ყოჩაღი ნუში“ და „მოხერხებული მიწის თხილი“. სახელი კარგად ასახავს პროდუქტების ინგრედიენტებს და იმ ადამიანებსაც, ვისთვისაც ის შეიქმნა.
რა სახის პროდუქციას ქმნით და რითია გამორჩეული?
– „ჭკვიანი თხილი“ ქართულ თხილეულზე დამზადებული თხილის, ნუშის და მიწის თხილის პასტებია, რომელიც მცირე რაოდენობით ნატურალური თაფლით და მადაგასკარის ვანილით არის შეზავებული. ვეგანებისთვის და მათთვის ვისაც დიაბეტი აწუხებს, უთაფლო ვერსიებსაც ვაწარმოებთ.
თხილის პასტა იდეალური საუზმე და სასუსნავია მათთვის ვინც ვარჯიშობს ან წონაში დაკლება სურს. მართალია ჭკვიანი თხილი მდიდარია ცხიმებით, მასში ცოტა ნახშირწყლები და ბევრი ცილაა, ამიტომ მცირე ულუფაც კი ენერგიით ავსებს და შიმშილის გრძნობას დიდი ხნით აცხრობს.
ძირითადად რა სახის ინგრედიენტები გამოიყენება პროდუქტის შესაქმნელად და სად ხდება ნედლეულის შეძენა?
– ჭკვიანი თხილი, ყოჩაღი ნუში და მოხერხებული მიწის თხილი მინიმალური ინგრედიენტებისგან შედგება და არ შეიცავს ხელოვნურ კონსერვანტებს და პალმის ზეთს. თხილეულის და თაფლის მომწოდებლები სამეგრელოში და კახეთში გვყავს. მადაგასკარის ვანილის გარდა, რომელსაც ცნობილი ფირმის Nielsen Massey-ს გან ვიძენთ, ყველა ინგრედიენტი ადგილობრივია.
როგორ შეხვდა მომხმარებელი სიახლეს და რამდენად მოთხოვნადია ბაზარზე?
– „ჭკვიანი თხილი“ პირველად დეკემბრის დასაწყისში გაიცნო მომხმარებელმა პროდუქცია ჩვენი ფეისბუკ გვერდის მეშვეობით და დიდი გამოხმაურება მოჰყვა. მომხმარებლები საოცარ სიტყვებს გვწერენ. რამდენიმე საშობაო ბაზრობაზეც მივიღეთ მონაწილეობა, სადაც ყველაზე გრძელი რიგი ჩვენს დახლთან იდგა. სამივე პროდუქტი ძალიან მოსწონთ და თანაბრად იყიდება.
სად შეიძლება პროდუქციის შეძენა და რა არის მისი ფასი?
– ამჯერად „ჭკვიანი თხილი“ ონლაინ მაღაზია soplidan.ge- ზე იყიდება. მალე საკუთარი ონლაინ მაღაზიაც გვექნება და ქსელურ სუპერმარკეტებთან მოლაპარაკებებსაც ვაწარმოებთ.
როგორია კომპანიის სამომავლო გეგმები?
– თავიდანვე ეს ბრენდი სერიოზული მიზნებით შევქმენით. რადგან ადგილობრივი მომხარებელი ასე აღტაცებით შეგვხვდა, გარკვეულ დროს ჩვენი პორთფოლიოს განვითარებას დავუთმობთ და მომავალში ექსპორტზე ვიფიქრებთ.
მარიამ ლეკიაშვილი
