„ვის გაუკვირდა, რომ მე შეწყალებაში რეკორდსმენი ვიქნებოდი? მე როდესაც ხმას მაძლევდნენ, ჩემი პოლიტიკური წარსული იცოდნენ. იცოდნენ, რომ არ მომწონდა ის, რასაც „ნაციონალური მოძრაობა“ აკეთებდა და ვაკრიტიკებდი ბევრი წლის განმავლობაში, რადგან უამრავი პატიმარი ჰყავდათ“ , – საახალწლოდ დიდი რაოდენობით პატიმრის შეწყალებაზე და ამ მხრივ რეკორდსმენობასთან დაკავშირებით შექმნილ აჟიოტაჟზე პრეზიდენტმა გიორგი მარგველაშვილმა „რუსთავი 2“-ზე, გადაცემა „არჩევანის“ ეთერში ისაუბრა.
„ის დღეები, როდესაც მე ვიხილავ შეწყალების საქმეებს, არის ძალიან მძიმე ჩემთვის. როგორც ჩემთვის ისე კომისიის წევრებისთვის სრულიად გასაგებია იმ ადამიანების ტკივილი, ვის მიმართაც ჩაიდინეს ძალადობა. შეწყალება არ ნიშნავს, რომ ისინი არიან უდანაშაულოები. შეწყალება არის ჰუმანური აქტი,რომელიც გულისხმობს, რომ ამა თუ იმ მიზეზით მივცეთ შანსი ან იმედი კრიმინალს. არაერთი მცდელობა ყოფილა, რომ განვიხილო კონკრეტული საქმე როგორც დაზარალებულის, ასევე კრიმინალის კუთხით, ეს ამორალური მიმაჩნია,რომ პირდაპირ ეთერში ვარჩიო კონკრეტული საქმეები. ეს არის მარტივი, „ქართულმა ოცნებამ“ დაიწყო საპრეზიდენტო კამპანია. მათი მესიჯია პრეზიდენტის წინააღმდეგ შავი პიარი.
არ იცოდნენ, რომ ვამბობდი, რომ „ნაციონალური მოძრაობა“ იმიტომ უნდა წავიდეს ხელისუფლებიდან, რომ ძალიან მკაცრი არის მოქალაქეების მიმართ. ამ საარჩევნო კამპანიას ვინც აწარმოებს, რა ლოგიკით აზროვნებს ძნელია ამის განსაზღვრა. იმ ფონზე, როდესაც ვკითხულობდი, რატომ არის ამდენი პატიმარი, შემდეგ რომ პატიმრების გამოშვებას დავიწყებდი, რატომ გაუკვირდათ?
როგორც ბევრმა მათგანმა გააგრძელა მიშას ტრადიციებით, მეც თანამდებობაზე რომ მოვიდოდი ვიქნებოდი იმით აღტაცებული, რომ ადამიანები ციხეში ისხდნენ? ამ ფონზე მიგეგმავენ საარჩევნო კამპანიას, რომ თურმე რეკორდსმენი ვარ ადამიანების გამოშვებაში, ეს კომიკურია.ციხეში რომ ბულბულები სხედან, ეს მარტო კომუნისტების დროს იყო სიმღერა, ციხეში სხედან ადამიანები, ვისაც დანაშაული აქვთ ჩადენილი. ზუსტად ამაზე გვქონდა საუბარი, როდესაც ოპოზიციაში ვიყავით, თუ რატომ იჭერდნენ 2 ქათმის და 3 კაბელის ქურდობაზე და რატომ აძლევდნენ 20 წელს. ეგრე როგორ უნდა დაგავიწყდეს ყველაფერი, როდესაც ოპოზიციაში იყავი“, – განაცხადა გიორგი მარგველაშვილმა.
პრეზიდენტმა ინტერვიუში მიხეილ სააკაშვილის მიმართ შეწყალების უფლების გამოყენების აბსურდულობაზეც ისაუბრა.
„შეწყალება არის უფლება,რომლის ბოროტად გამოყენებაც არსად არ არის აღწერილი. როდესაც პრეზიდენტს გაასამართლებ ისეთი მუხლით, რომელიც კოდექსით არ არის გაწერილი, არღვევ ძირითად სამართლის პრინციპებს. სააკაშვილის მიმართ ეს ბრალდება არის სამარცხვინო ქვეყნის სამართლებრივი იმიჯისთვის. ამ დროს მე ვგრძნობ,რომ სააკაშვილმა მაჯობა ამ პროცესში და იმ პერიოდის ბრძოლა გირგვლიანის საქმეზე გახდა კომიკური. მე სასამართლოს შეცდომებს არ ვასწორებ შეწყალებით, ამიტომ სააკაშვილის საქმეში არ გამიჩნდება ემოცია, რომ შევიწყალო. ეს სასამართლო და პროკურატურა ამ ტრადიციებით შექმნა სწორედ სააკაშვილმა. არ მჯერა,რომ ის არის მსხვერპლი. სააკაშვილის სისტემა ყვავის ამ შემთხვევაში. ჩემი ვალდებულება არ არის არაკვალიფიციური გამოძიების გასწორება“, – განაცხადა გიორგი მარგველაშვილმა.
მანანა ღოღობერიძე
