„თუ თანამდებობის პირი დეკემბერში იღებდა 4 ათას ლარს, იანვარში და მომდევნო თვეებში ის აიღებს 4 ათას ლარს. ამ კანონით მომდევნო წლების განმავლობაში სახელფასო ფონდი არ გაიზრდება“ , – თბილისის მერიაში დაგეგმილ ცვლილებებზე, მერის მოადგილე მაია ბითაძემ „იმედზე“, გადაცემა „ქრონიკის“ ეთერში ისაუბრა.
„ხელფასების და დანამატების გაერთიანებაზე პარლამენტმა გასულ წელს იმსჯელა და ეს კანონპროექტი 2018 წლის იანვარში ამოქმედდა, ამის შესახებ საზოგადოებამ იცის. მერიის თანამშრომლის შემოსავალი არის საჯარო და მარტივია გადავამოწმოთ რას იღებდა წლების განმავლობაში და რას მიიღებს ამ ცვლილებებით.
ამ კანონით პრემია საერთოდ აღარ არსებობს, ეს არის ჯილდო და გამოირიცხება რისკი, რომ ყოველთვიურად იყოს გაცემული პრემია. ზუსტად არის განსაზღვრული რა შემთხვევაში და რამდენი უნდა გაიცეს, ეს არის წლიური მოცულობის 20 %. გამოირიცხება მახინჯი პრაქტიკა,რომ თანამშრომლები თვის განმავლობაში ორჯერ იღებდნენ შემოსავალს. კახი კალაძის გუნდის წევრებს პრემია არც ერთხელ არ აგვიღია.
მერიაში რეორგანიზაცია მიმდინარეობს და ითვალისწინებს ახალი ფუნქციების დამატებას სხვადასხვა საქალაქო სამსახურისთვის. ყველა ადამიანი გაივლის კონკურსს იქ,სადაც ახალი ფუნქციები იქნება დამატებული. გვაკრიტიკებენ რომ ფინანსური ოპტიმიზაცია ვერ გავატარეთ ისეთი,როგორსაც ვგეგმავდით. ჩვენ არასოდეს გვითქვამს,რომ იქნებოდა მასობრივი დათხოვნები“ , – განაცხადა მაია ბითაძემ.
მანანა ღოღობერიძე
