„ოპოზიციური პარტიების შანსები ძალიან მცირეა, თუმცა იქამდე კიდევ 9 თვეა და არ ვიცით პოლიტიკურად რა მოხდება ქვეყანაში. ყველას ესმის,რომ პრეზიდენტის ინსტიტუტი არ არის ძლიერი და ამ პოლიტიკურ ფიგურას აქვს უფრო სიმბოლური დატვირთვა. ამიტომ მნიშვნელობა პარტიაზე მეტად პიროვნებას ექნება“ , – „ენ-დი-აი“-ის პოლიტიკური კვლევის შედეგებზე, პოლიტიკურ ავტორიტეტსა და საპრეზიდენტო არჩევნებზე პარტიების შანსების შესახებ ექსპერტმა გია ნოდიამ „რუსთავი 2“-ზე, გადაცემაში „განსხვავებული აქცენტები“ ისაუბრა.
„ოპოზიციაში თუ გამოჩნდა ვინმე, ვისაც ექნება ქარიზმა, ნდობა, შესაძლოა აღმოჩნდეს კანდიდატი,რომელიც სირთულეს შეუქმნის ხელისუფლების კანდიდატს. ამ ეტაპზე ოპოზიციის კანდიდატს შანსები არ აქვს. დღევანდელი „ქართული ოცნება“ არის რუხი მასა, არ ჩანს ამბიციური, ახალი პოლიტიკური ფიგურები. ერთადერთი გამონაკლისი იყო კახა კალაძე. ვინც იყო ამბიციის მატარებელი „თავისუფალი დემოკრატებიდან“, „რესპუბლიკელებიდან“ ისინიც მოიშორეს და ახლა შემსრულებლების პარტია დარჩა. ახლო პერსპექტივაში არ ჩანს,რომ კალაძის გუნდი გამოეყოს მათ. ის გახდა მერი და როგორც მერმა უნდა აჩვენოს თავისი უნარები. მითუმეტეს საპრეზიდენტო არჩევნებში აბსურდია, რომ ის ვინმეს დაუპირისპირდეს.
გადაუწყევეტელი ამომრჩეველის ალბათ 52%-ია, რომლებიც არც ერთ პარტიას არ უჭერენ მხარს. ტაიმაუტი აქვს ხალხს, პოლიტიკურ კლასს არ ენდობა და ეს ბუნებრივია. ახალი ძალის, „შუაშისტური“ ამომრჩევლის სივრცე არსებობს, თუმცა ჯერჯერობით ასეთი არავინ გამოჩნდა. სივრცის არსებობა არ ნიშნავს, რომ მას ვინმე გამოიყენებს, შესაძლოა ისევ დარჩეს ბრძოლა „ნაციონალურ მოძრაობასა“ და „ქართულ ოცნებას“ შორის. ყოველთვის ხდება რაღაცები რასაც არ ველით, ამიტომ დაველოდოთ“ , – განაცხადა გია ნოდიამ.