„კონკურენციის სააგენტოში წარმოდგენილი საჩივარი შევისწავლეთ და მივედით დასკვნამდე, რომ მისი დიდი ნაწილი ვერ აკმაყოფილებდა მოთხოვნებს. დადასტურებულია,რომ სახელმწიფო ხელისუფლების ორგანოების მხრიდან კონკურენციის შეზღუდვას არ ჰქონია ადგილი“ , – ამის შესახებ კონკურენციის სააგენტოს დირექტორმა, ნოდარ ხადურმა „ტვ პირველზე“, გადაცემა „ლევან ჩხაიძის დღის ამბების“ ეთერში ისაუბრა.
„ვიდრე არ დასრულდება გამოძიება, ვერ ვიტყვით რასთან გვაქვს საქმე. მივიღებთ მასალებს საავტომობილო კომპანიებისგან, შევისწავლით ბაზრის მდგომარეობას და შემდეგ მივიღებთ გადაწყვეტილებას. კომპანიების მოთხოვნით აიფონების, ფქვილის, ფოთის პორტის თემაც შევისწავლეთ. ბაზრის კვლევა ჩვეულებრივი მოვლენაა, ხომ არ გვაქვს შეთანხმებული მოქმედებების საფუძველი. შესწავლის გარეშე განცხადებებს ვერ გავაკეთებ. სახელმწიფო ორგანოების მიერ კონკურენციის კანონმდებლობის დარღვევის ფაქტები არ ყოფილა, მათ შორის კომპანია „სიტროინ ჯორჯია“-ს მიმართ.
ჩვენმა შესწავლამ დაადასტურა,რომ ჯანდაცვის სამინისტროს ტენდერში არანაირი დარღვევა არ ყოფილა. საუბარია 6 რეანიმობილის შეძენაზე,როდესაც 4-ჯერ ჩაიშალა ტენდერი 2016 წლის განმავლობაში. მე-5 ტენდერში არავინ მიიღო მონაწილეობა და მხოლოდ მე-6 ტენდერში გამოვლინდა გამარჯვებული. ეს ადასტურებს, რომ სამინისტრო დაინტერესებული იყო ფართო კონკურენციის პირობებში ჩატარებულიყო პროცესი. საქართველოს ბაზარზე მოღვაწე 6 კომპანიის ქმედებას ვიკვლევთ, პროცესი მხოლოდ „სიტროინს“ არ ეხება“ , – განაცხადა ნოდარ ხადურმა.
მანანა ღოღობერიძე
