„აქ ვადაგასულობაზე არ არის ლაპარაკი, მთავარია ტემპერატურული რეჟიმის დაცვა. ერთი ცალი ბაქტერია არაფერს გამოიწვევს თუ ის საჭირო ტემპერატურაზე შეინახება. ყველა ბაქტერიას უყვარს მაიონეზი“ , – „კარფურის“ ქათმის სენდვიჩით 4 ადამიანის მოწამვლის ფაქტზე დაავადებათა კონტროლის ეროვნული ცენტრის დირექტორის მოადგილემ პაატა იმნაძემ „იმედზე“, გადაცემა „ქრონიკის“ ეთერში ისაუბრა.
სალმონელა ყველაზე მეტად შესაძლოა ყოფილიყო სალათის ფურცელში, ასევე ქათმის ხორცში. სალათის ფურცელი თუ მოდის ნიადაგზე, იყენებენ სასუქებს, მათ შორის ორგანულ სასუქებს – ნაკელს. ამიტომ შესაძლოა იყოს დაბინძურების საფრთხე. თუ ეს ბაქტერია მოხვდება მაიონებზში და არ იქნება დაცული ტემპერატურული რეჟიმი, ის გამრავლდება მაიონეზში. ამის გაკონტროლება მომხმარებელს არ შეუძლია. წარმოების ყველა ეტაპზე უნდა იყოს დაცული პროდუქტის სიჯანსაღე.
რაც უფრო მეტად პოპულარული გახდება სწრაფი კვების ობიექტები, მით უფრო მოიმატებს მომართვიანობის რაოდენობა ინტოქსიკაციით. ეს მხოლოდ საქართველოს ტენდენცია არ არის, ასე ხდება ევროპის და ამერიკის განვითარებულ ქვეყნებშიც. როდესაც ინდუსტრიული ხდება სწრაფი კვების პროდუქტების წარმოება, ასეთი აფეთქებები ხშირია“ , – განაცხადა პაატა იმნაძემ.
პაატა იმნაძემ ბათუმში „წითელათი“ ინფიცირების ხშირი შემთხვევების მიზეზებზეც ისაუბრა.
„ „წითელა“ არის დაავადება, რომელიც თუ არ ხარ იმუნირებული, აუცილებლად მოგნახავს და ავად გაგხდის, ამის შესახებ ჯერ კიდევ 2008 წელს ვსაუბრობდით, რომ მილიონი ადამიანი უნდა აგვეცრა, თუმცა მხოლოდ ნახევარი მილიონი ავცერით. ის ვინც არ არის აცრილი, თუ არ აიცრება, ისინიც აუცილებლად ავად გახდებიან. ეს ეხება ახალგაზრდებს, 18-დან 30 წლამდე. ვაქცინაცია უფასოა სახელმწიფოს დაფინანსებით. არ არსებობს ელექტრონული ბაზა თუ ვის არ აქვს აცრილი, ამის მოძებნა შეუძლებელია“ , – განაცხადა პაატა იმნაძემ.
მანანა ღოღობერიძე
