შინაგან საქმეთა სამინისტროს „112“-ის დეპარტამენტმა ინოვაციურ და თანამედროვე ტექნოლოგიებზე აგებული პროექტი- „112“-ის მობილური აპლიკაცია შექმნა.
შსს-ის ინფორმაციით, საქართველოს ტერიტორიაზე მყოფ ნებისმიერ პირს, შესაძლებლობა ექნება ჩამოტვირთოს და ისარგებლოს „112“-ის მობილური აპლიკაციით. აპლიკაციის მთავარ უპირატესობას მოქალაქის ადგილმდებარეობის დაუყოვნებლივ განსაზღვრა წარმოადგენს, რაც საგანგებო სამსახურების შემთხვევის ადგილზე მისვლის დროს საგრძნობლად შეამცირებს.
აპლიკაციას ისეთი მნიშვნელოვანი ფუნქციები აქვს, როგორიცაა ჩუმი განგაშის გაგზავნა „112“-ში (SOS) და ოპერატორთან მიმოწერა („ჩატი“). აპლიკაცია უფასოა და IOS-ისა და Android-ის პლატფორმების მხარდაჭერა აქვს. იგი ხელმისაწვდომია, როგორც ქართულ, ასევე ინგლისურ და რუსულ ენებზეც.
აღსანიშნავია, რომ მობილური აპლიკაციით გადაუდებელი დახმარების ცენტრთან დაკავშირება, მხოლოდ მსოფლიოს 13 ქვეყანაშია დანრეგილი.
ნინო ზარიძე
