მარნეულის სოფელ აზიზქენდში კომპანია „მზა ჩითილის“ სათბური გაიხსნა. როგორც „თბილისი თაიმსთან“ საუბრისას კომპანიაში აცხადებენ კომპანიამ პირველი სათბური გახსნა საქართველოში, სადაც ამზადებენ როგორც ჩვეულებრივ, ასევე დამყნობილ ჩითილებს.
„ჩვენი კომპანიის მიზანია, საქართველოში შემოიტანოს და დანერგოს თანამედროვე ტექნოლოგიები. ეს ყველაფერი ქართველ ფერმერებს დაეხმარება მიიღონ უხვი რაოდენობის, ხარისხიანი და ჯანსაღი მოსავალი რაც შეიძლება მცირე დანახარჯებით.“
კომპანია ფერმერებს სრულ მომსახურებას სთვაზობს, როგორიცაა სარწყავი სისტემები, ასევე ჩითილები და უფასო კონსულტაცია.
როგორც ცნობილია სათბური 11 000 მ2-ზეა გაშენებული და აქვს შესაძლებლობა ერთი თვის განმავლობაში აწარმოოს 7 მილიონი ჩითილი. სათბური ასევე ფლობს 30 000 მ2 სივრცეს, სადაც დამყნობილი და ბუნებრივი ნერგები გამოყავთ.
„ჩვენ ვაწარმოებთ როგორც ბოსტნეულის, ასევე ყვავილების ჩითილებს. ჩვენი კომპანია მაღალი დონის საწარმოთი გამოირჩევა, რადგან ვიყენებთ უახლეს იტალიურ ტექნოლოგიებსა და რობოტებს (დანადგარებს).“
„მზა ჩითილი“ მომხმარებლებს საშუალებას აძლევს შეიძინონ ჩეულებრივი პომინდვრის, წიწაკის, ბადრიჯნის, კიტრის, ნესვის, საზამთროს, კომბოსტოს, ნიახურისა და სანათის ფურცლის ჩითილები. გარდა ამისა, კომპანია აწარმოებს დამყნობილი პომინდვრის,საზამთროს, კიტრის, ნესვის, წიწაკისა და ბარდიჯნის ჩითილებს.
„სათბურს რამდენიმე უპირატესობა აქვს, ნაადრევი მოსავალი, მზა ჩითილი ადრეულ მოსავალს უზრუნველყოფს. მნიშვნელოვანია აგრეთვე დროის, ენერგიის და თესლების ეკონომია, რადგან დღეს ჰიბრიდული თესლი ძალიან ძვირი ღირს. ჩითილი ცოცხალი, მშრალი ნივთიერებებით მდიდარი, მსხვილი და ძლიერია, თან მოსავლიანობა უფრო მაღალია და ამასთანავე უფრო ხარისხიანი. მცენარის გაზრდისა და მისი ნიადაგში გადარგვის პერიოდი კი ჩქარდება 30-50 დღით. ამ დროს ფერმერი დაზღვეულია შეცდომისგან, ის თავადვე ხედავს, თუ რას იძენს ჩვენგან, შესაბამისად, ჩვენგან წაიღებს მხოლოდ ჯანსაღ ჩითილებს და არ დასჭირდება სათადარიგო რაოდენობა.“
„მზა ჩითილის“ დამფუძნებელი კომპანია WG Techno (წყლისა და გაზის ტექნოლოგია), რომელიც თანამედროვე სარწყავი სისტემების პირველი და ყველაზე დიდი მომწოდებელია. იგი თბილისში აწარმოებს პოლიეთილენის მილებს.
მარიამ ლეკიაშვილი
