“პოლიციელის ხელფასი არაადეკვატურია, ამის შესახებ შინაგან საქმეთა მინისტრმა პირველი არხის გადაცემაში განაცხადა.
„არ შეიძლება, 800 ლარი ადეკვატური ხელფასი იყოს ადამიანისთვის, რომელიც მეორე მოქალაქის სიცოცხლეზე, უსაფრთხოებაზე, ჯანმრთელობაზეა პასუხისმგებელი და თავის მოვალეობას კეთილსინდისიერად ასრულებს“, – განაცხადა გიორგი გახარიამ.
ამ განცხადებით შინაგან საქმეთა მინისტრმა უპასუხა გადაცემის წამყვანის შეკითხვას, რამდენად ადეკვატურია პოლიციელის ანაზღაურება იმ ფონზე, როცა მაღალჩინოსნების სოლიდურ პრემია–დანამატებზე ინფორმაცია ყოველდღიურად ვრცელდება.
„შსს–ში რეფორმების ძირითადი მიზანი იყო სამოქალაქო კომპონენტში ოპტიმიზაცია, რომელიც ფაქტობრივად, უკვე განხორციელების ეტაპზეა. დაახლოებით ოთხასი ასეთი პოზიციაა შემცირებული. ეს მხოლოდ ხელფასის ეკონომია არ არის. ეს გახლავთ ამ პოზიციებთან დაკავშირებული ავტოტრანსპორტი, საწვავი და ა.შ“, – განაცხადა გახარიამ.
მინისტრმა ასევე აღნიშნა, რომ სოციალური გარანტიების ძირითადი კომპონენტი მხოლოდ ხელფასი არ არის.
„ჩვენ ამას უფრო კომპლექსურად ვუდგებით და ვთვლით, რომ ეს ადამიანური რესურსების მართვის ერთ–ერთი კომპონენტია. სოციალური დაცვის ის გარანტიები და პროგრამები, რომლებიც შსს–ში უახლოეს პერიოდში განხორციელდება, სწორედ ჩვენი პოლიციელების სოციალური დაცვისკენ იქნება მიმართული“, – განაცხადა გიორგი გახარიამ.
