კომერციული ბანკების საკრედიტო დაბანდების მოცულობა (არარეზიდენტებზე გაცემული სესხების ჩათვლით), 2013 წლის აგვისტოში, წინა თვესთან შედარებით, 1.9%-ით, ანუ 176.8 მლნ ლარით გაიზარდა და მიმდინარე წლის პირველი სექტემბრისათვის 9.3 მლრდ ლარს გადააჭარბა.
ამავე პერიოდში, ეროვნული ვალუტით გაცემული სესხების მოცულობა 92.7 მლნ ლარით (3.0%-ით), ხოლო უცხოური ვალუტით გაცემული სესხების მოცულობა 84.0 მლნ ლარით (1.4%-ით) გაიზარდა.
რეზიდენტი იურიდიული პირებისათვის 2013 წლის აგვისტოს ბოლოს კომერციულ ბანკებს ეროვნული ვალუტით გაცემული ჰქონდათ 856.7 მლნ ლარის (წინა თვესთან შედარებით 2.5%-ით ანუ 20.6 მლნ ლარით მეტი), ხოლო უცხოური ვალუტით – 3.9 მლრდ ლარის (შესაბამისად, 0.7%-ით ანუ 27.9 მლნ ლარით მეტი) მოცულობის სესხი.
იურიდიული პირების დაკრედიტების მთლიან მოცულობაში ყველაზე დიდი ხვედრითი წილი – 46.4%-ი ვაჭრობის სფეროზე მოდის. მიმდინარე წლის ივლისთან შედარებით, აგვისტოში ვაჭრობის სფეროზე გაცემული სესხების მოცულობა 0.1 პროცენტით ანუ 1.2 მლნ ლარით შემცირდა და 2.2 მლრდ ლარი შეადგინა.
მრეწველობაზე გაცემული სესხების წილმა იურიდიულ პირებზე გაცემული ვადიანი სესხების საერთო მოცულობაში 19.3 %-ი შეადგინა, რაც 2013 წლის პირველი სექტემბრისათვის 920.3 მლნ ლარით განისაზღვრა (0.6%-ით ანუ 5.1 მლნ ლარით ნაკლები პირველი აგვისტოს მდგომარეობასთან შედარებით); 9.3 პროცენტი მოდის მშენებლობაზე, რაც 441.9 მლნ ლარია (1.2%-ით, ანუ 5.2 მლნ ლარით მეტი, შესაბამისად). ამდენად, იურიდიული პირების დაკრედიტების საერთო მოცულობის 74.9%-ი მხოლოდ სამ დარგზე – მრეწველობაზე, მშენებლობასა და ვაჭრობაზე მოდის.
2013 წლის აგვისტოს განმავლობაში 3.4%-ით ანუ 136.0 მლნ ლარით გაიზარდა რეზიდენტი ფიზიკური პირების დაკრედიტების მოცულობა და მიმდინარე წლის პირველი სექტემბრისათვის 4.2 მლრდ ლარს მიაღწია.
25.09.13
